Үзең белән битлегеңне алдыңмы?

Дилбегәне йомшаттык кебек.... Кайбер кибетләрдә битлексез кешеләр дә күренгәли. Илнең баш санитар табибы Анна Попова халык гадәти саклану чараларын үтәмәсә, йогышлы чир үсәчәк, ди. Димәк, безнең үзебездән тора. Әлбәттә, битлекләрне үзебез белән алырга онытырга да мөмкинбез. Шуңа да халыкка хезмәт күрсәтү урыннарында саклану чаралары булсын иде. Дөрес, даруханәләрдә, сәүдә нокталарында сатып алырга битлекләр бар. Бер үк төрле бер тапкыр киелә торган битлекләр 3 сумнан 30 сумга кадәр тора. Нишләп алардан бизнес ясарга? Тукымадан эшләнгән маскалар турында сүз бармый.  Маскасыз кертмибез, дип кычкырганчы, итагатьле итеп маска тәкъдим итәргә кирәк. Маска бушка яки 3--5 сум булса, кеше мондый игътибардан  күңеле тулып елап җибәрергә мөмкин! Кибеттә берәү әйтә: "Элекке байлар булса, бу масканы бушка бирерләр иде", -- дип.