Фәрит Мөхәммәтшин республиканың көньяк районнарында эш сәфәрендә

Хастаханәгә сәламәтлек саклауның беренчел звеносын модернизацияләүнең федераль программасы кысаларында үткәрелгән капиталь ремонт аксубайлылар өчен әһәмиятле вакыйга булды. Бина 1984 елда ук төзелгән булган, һәм бу вакыт эчендә биредә ремонт булмаган. Бинаны реконструкцияләүгә һәм Аксубай үзәк хастаханәсен өстәмә җиһазландыруга 30 миллион сумнан артык акча тотылган. Яңартылган медицина учреждениесендә хатын-кызлар консультациясе ачылган. Моннан тыш, Үзәк район хастаханәсендә яңа җиһазлар, рентген һәм УЗИ аппаратлары урнаштырылган. "Медицина кадрлары белән артык зур проблемалар юк, – диде  Аксубай үзәк хастаханәсенең баш табибы Марсель Исламов, – февральдә "Земский доктор" программасы буенча бер гаилә район үзәгенә күченә. Әлбәттә, тар белгечләр һәм терапевтлар буенча сораулар кала, әмма без эшне алып барабыз".

Мәдәният йортында узган район советының хисап сессиясе 2022 елда башкарылган эшләргә йомгак ясады һәм 2023 елга планнарны билгеләде. Хисап белән Аксубай районы башлыгы Камил Гыйльманов чыгыш ясады.

Район башлыгы районда илкүләм проектларны һәм республика дәүләт программаларын гамәлгә ашыруга аерым игътибар бирде. Әйтик, узган елда Аксубай районында 60 тан артык объект төзелгән, төзекләндерелгән яки капиталь ремонтланган. Аерым алганда, Шәрбән авылында фельдшер-акушерлык пункты ачылган, Савгач урта мәктәбенә капиталь ремонт ясалган. “Безнең ишегалды” президент программасы буенча 14 ишегалды территориясе төзекләндерелгән. Халыкны эчәргә яраклы су белән тәэмин итүнең республика программасы ярдәмендә Аксубай урамының дүрт урамында һәм Иске Татар Адәм суы авылында 7 км суүткәргеч төзелгән.

«Шушы программалар ярдәмендә безнең поселок елдан-ел үзгәрә бара, - дип басым ясады Камил Гыйльманов, - аксубайлылар һәм бистә кунаклары төзекләндерелгән скверларга һәм паркларга рәхәтләнеп йөриләр». Район башлыгы республика җитәкчелегенә муниципалитетларның авыл территорияләрен комплекслы үстерүгә аерым игътибар биргәннәре өчен рәхмәт белдерде.

Районның социаль-икътисадый үсеш күрсәткечләренә килгәндә, күп тармакларда уңай динамика саклана. Тулаем территориаль продукт 2021 ел нәтиҗәләре буенча 16,9 млрд. сумга җиткән (алдагы чор белән чагыштырганда 148,2 %). Узган елның 11 аенда сәнәгать җитештерүе индексы 100,8 % тәшкил иткән. Районда инде 5 предприятие резидент булган «Морозко» сәнәгать паркы үз эшен башлаган.

АПК җитештерү-икътисадый күрсәткечләре буенча районнар арасында Аксубай районы 15 нче урынны алып тора (былтыр 21 нче урында булган). Ел йомгаклары буенча авыл хуҗалыгының тулай продукциясе күләме 4,4 млрд. сум тәшкил итәчәк.

«Авылда кече һәм урта эшкуарлыкны үстерүгә ярдәм итү буенча дәүләт программалары фермерлык хәрәкәтен үстерүгә бик зур этәргеч бирде, - диде Камил Гыйльманов, - яшьләргә ярдәм итү өстенлеле булып кала, ә яңа гына эш башлаган фермерларның инициативаларын тормышка ашыруга «Агростартап» дәүләт программасы да ярдәм итә. Шулай ук дәүләт программалары элегрәк оештырылган крестьян-фермер хуҗалыкларының үсешенә дә ярдәм итәләр».
Районда шулай ук сөт җыюга һәм әзерләүгә махсуслашкан “Экопродукт-Аксубай” һәм  ит ярымфабрикатлары җитештерүче “Аксубай”  авыл хуҗалыгы кооперативлары эшли.

«Аксубай районының күпмилләтле хезмәт сөючән халкы, республика белән бергә, билгеләнгән планнарны тормышка ашыру өчен, 2022 нче елда мөмкин булганның барысын да эшләде, - диде Дәүләт Советы Рәисе Фәрит Мөхәммәтшин утырышка йомгак ясап. - Районда социаль һәм сәнәгать объектлары барлыкка килә. Әмма район үсә, шуңа да карамастан, резервлар бар әле".

Парламент башлыгы кече һәм урта бизнесны үстерүгә җитди игътибар бирергә кирәклеген билгеләп үтте, өстәвенә, кече һәм урта бизнесның өлеше уртача республика күрсәткечләреннән түбән, 14-15 % чамасы гына (ТРда 25 %).  “Районда актив кешеләр күп, аларның башлангычларын хупларга, бу процесска кертергә кирәк”, - дип мөрәҗәгать итте Фәрит Мөхәммәтшин авыл җирлекләре башлыкларына һәм район җитәкчелегенә.

Фәрит Мөхәммәтшин сүзләренә караганда, Аксубай районында авыл хуҗалыгы продукциясен җитештерүне арттыру өчен дә потенциал бар. Быел районның республика уңышына керткән өлеше 137,4 мең тонна  ашлык (2021 елга караганда 1,7 мәртәбә күбрәк), уртача уңдырышлылык - гектарына  39,6 ц.  (Татарстан Республикасы  буенча - 37,2).

Районның авыл хуҗалыгы тармагындагы проблемалы мәсьәләләр арасында ТР Дәүләт Советы Рәисе сөт җитештерүне атады. Әмма, Фәрит Мөхәммәтшин әйтүенчә, районда савым сыерларын яңарту күзәтелә. «Киләсе елда күрсәткечләр югарырак булыр дип ышанам», - дип басым ясады Фәрит Мөхәммәтшин.
Аксубай районы Советы утырышында шулай ук РФ Федераль Җыены Дәүләт Думасы депутаты Айдар Метшин, Дәүләт Советы депутатлары Рәис Сөләйманов, Михаил Сыровацкий, Алсу Тарханова, Шамил Яһудин, авыл җирлекләре башлыклары, район предприятиеләре һәм оешмалары җитәкчеләре катнашты. 
Көннең икенче яртысында Фәрит Мөхәммәтшин Нурлатта район советының хисап утырышында катнашачак.

Чыганак: http://shahrikazan.ru/news/yazmalar/frit-mkhmmtshin-respublikany-knyak-rayonnarynda-esh-sfrend