Артымнан йөрүчеләр юкка чыкты, берүзем калдым...

автор, 5 гыйнвар 2023 - 10:34

1370

Исәнмесез, хөрмәтле редакция. Сезгә ирдән иргә сикереп йөргән, ике ир арасыннан сайлый алмый тәмам алҗыган хатын-кызлар күп яза. Ә мин менә, киресенчә, 50 ягына таба баручы ялгыз хатын. Насыйбымны таба алмадым шул, кызганыч. Гомерем ялгызлыкта узып бара.

Артымнан йөрүчеләр юкка чыкты, берүзем калдым...

Күптән түгел туган көнем булды. Мин аны кабат ялгызлыкта үткәрдем. Иртән әнием шалтыратып котлады. Әле дә ярый ул исән-сау, зур терәгем минем. Эштә бөтенләй котламадылар, онытканнардыр инде. Кич белән дус кызым шалтыратты, аның белән озак кына сөйләштек.

Институтта укыганда, бик чибәр идем. Егетләр дә күз ата иде үземә. Ләкин мин никтер ашыкмадым, өлгерермен әле дип яшәдем. Аннан соң ничектер дөнья үзгәрде, артымнан йөрүчеләр әкрен генә юкка чыгып бетте. Берүзем калдым. Иң аянычы шул – гаилә корып, бала табарга өлгермәдем. Әниемнән көнләшәм, аның ичмасам кызы – мин бар...