Арчада «Җиңү җырлары» студентлар фестиваленең зона этабы узды

Җыр фестиваленең зона этаплары Арчадан башланды. Шулай ук алар Әлмәт, Алабуга, Норлат һәм Кама Тамагында да узачак. 

Бүген, 12 март көнне Арча педагогия көллиятендә дүрт уку йорты студентларының ансамбль һәм хорлары чыгыш ясады. Әлеге коллективлар - беренче турга җибәрелгән видеоязмалар арасыннан сайлап алынган иң яхшы башкаручылар – Арча педагогия көллияте җыелма хоры һәм халык вокаль ансамбле,  Арча аграр-сәнәгать һөнәр көллиятенең вокаль ансамбле, Әтнә авыл хуҗалыгы техникумы вокаль ансамбле, Лаеш техник-икътисадый техникумының җыелма хоры.

Катнашучыларның чыгышларына "Татарстан-Яңа гасыр" хәрәкәте Югары Советы Башкарма комитеты рәисе, ТРның атказанган мәдәният хезмәткәре, "Җиңү җырлары" фестивале проектының җитәкчесе Алсу Тарханова, ТРның атказанган сәнгать эшлеклесе, профессор Әлфия Җаббарова, ТРның композиторлар союзы рәисе Ильяс Камалов, Н.Җиһанов исемендәге Казан дәүләт консерваториясенең яшьләр сәясәте һәм тәрбия эше буенча белгече Лилит Ёлчян, ТРның атказанган мәдәният хезмәткәре, Казан дәүләт мәдәният институты доценты, ТР студентлар хоры җитәкчесе Эльвира Галиуллина, Идел буе дәүләт су транспорты университетының Казан филиалы директоры Ильяс Сәлахов бәя бирделәр.

«Биредә яшьләрне дә, ветераннарны да сәламли алуыма чиксез шатмын. Бүген фестиваль кысаларында зона турларының беренче көне. Мондый чара уздыруда безнең инде тәҗрибәбез бар. Тик аның быелгысы Җиңүнең 80 еллыгына һәм Ватанны саклаучылар елына багышлана. Безгә әби-бабаларыбызның батырлыкларын истә тотарга, киләчәк буынга җиткерергә кирәк. Совет халкының бу җиңүгә керткән өлеше зурлыгын онытмаска тиешбез. Сез, яшьләрнең бу фестивальдә катнашуы, тагын бер кат сезнең чын патриотлар икәнегезне күрсәтә. Сез дөрес юлда», – дип сәламләде "Җиңү җырлары" фестивале проектының җитәкчесе Алсу Тарханова. 

Арча районы иҗтимагый советы рәисе Надия Мифтахетдинова  әлеге фестивальнең яшь талантларны үстерүдә зур эш булып торуын, тәрбияви әһәмияте зур икәнлеген ассызыклап үтте.  

Фестивальдә катнашучыларның чыгышлары талантлы яшь райондашлар башкаруындагы җыр-биюләр белән үрелеп барды. Һәр яңгыраган җырда дәһшәтле сугыш еллары тасвирланды.

Беренче зона этабы нәтиҗәләре буенча, Арча педагогия көллияте җыелма хоры (җит. – Эльвира Гарифуллина), көллиятнең «Арча егетләре» халык вокаль ансамбле (Диләрә Хәйдәрҗанова),  Арча аграр-сәнәгать һөнәр көллиятенең «Үрнәк егетләре» вокаль ансамбле (җит. – Гүзәл Минхәерова), Әтнә авыл хуҗалыгы техникумының «Яшьлек» вокаль ансамбле (җит. – Габделәхәт Шакиров) җиңүче исеменә лаек дип игълан ителде һәм йомгаклау этабында катнашу хокукына ия булдылар.

Чараның концерт өлеше тәмамланганнан соң, хор, ансамбль җитәкчеләренә башкала остазлары тарафыннан осталык дәресләре үткәрелде. 

«Җиңү җырлары» студентлар хорлары фестивале Бөек Ватан сугышы елларында Россия халкының данлы тарихи үткәненә хөрмәт формалаштыруга, Татарстан Республикасы студентлары арасында хор мәдәниятен пропагандалауга, яшь талантларны ачыклауга юнәлдерелә. Барлык зона турлары үткәннән соң, йомгаклау туры һәм гала-концерт 26 апрельдә Казанның «Сәйдәш» мәдәни үзәгендә узачак.