erid:LgsiSnffX
Арск-Информ

Арча районы

18+
Рус Тат
2024 - Гаилә елы
Арча яңалыклары

Арчалар беренче урынга чыкты, яки яңа көрәш бәйгесе турында кыскача

Татарстан тагын бер көрәш ярышына баеды. Бүген Фатыйх Сибагатуллин истәлегенә багышланган урта һөнәри белем бирүче уку йортлары арасындагы турнирга нигез салынды. Ул Казан энергетика көллияте базасында узды.

 

Фатыйх Сәүбәнович үзе дә көрәш белән ныклап шөгыльләнгән, күп тапкыр батыр калган, аннары озак еллар дәрәҗәле урыннарда эшләде: республиканың авыл хуҗалыгы һәм азык-төлек министры, Норлат районы башлыгы, Россия Дәүләт Думасы депутаты булды. Илебез парламентында 6 ел дәвамында аның ярдәмчесе эшен алып барган Раил Шәмсетдинов әйтүенчә, Сибагатуллин һәрвакыт көрәш белән кызыксынган, бер ярышны да калдырмаска тырышкан, улларына да әлеге спорт төренә мәхәббәт уятуда зур роль башкарган. Аның хезмәтен, милләт һәм республика өчен тырышлыгын исәпкә алып, әлеге турнирны уздырырга карарга кылганнар да инде. Бу идеяны исә Раил Шәмсетдинов Казан энергетика көллияте директоры Азат Хәбибуллин белән берлектә тормышка ашырган. Ни өчен нәкъ менә шул уку йортында узуы хакында кызыксынучыларга язам монысын. 

Ярышта Татарстанның 11 командасыннан 67 көрәшче катнашты. Алар 50, 60, 70, 80, 90 һәм 100 килограмм авырлыктагы категориядә бил алышты. Турнирга кунак булып, Фатыйх Сибагатуллинның гаиләсе – хатыны Рәдифә Габдулловна, кызы Роза, уллары Рөстәм белән Рәшит тә килде. Алар ире һәм әтиләренә багышланган стендны карадылар. Анда аның тормышыннан алынган иң матур мизгелләр күрсәтелгән иде. Менә ул яшь чагында ул чорда Татарстан премьер-министры Рөстәм Миңнеханов һәм авыл хуҗалыгы һәм азык-төлек министры Марат Әхмәтов белән елмаеп басып тора. Икенче фотода исә үзенең китабын тотып төшкән. Беләсез бит, ул әле язучы да, тарих битләрен дә ярыйсы гына актарды. Аларны чара вакытында бушлай алырга мөмкинлек бирелде. Турнирның ачылыш тантанасында Фатыйх Сәүбәноваичның хатыны Рәдифә Габдуллвна чын күңеленнән көрәшне яратулары һәм ирен искә алулары өчен рәхмәтен әйтте. “Фатыйх Сәүбәнович үзе дә көрәшче иде, һәрвакыт та көрәшне яратты, көрәшчеләргә ярдәм итеп торды. Безгә дә менә шулай бергә булып, киләсе елга да җыелырга насыйп булсын, — дигән теләкләрен җиткерде ул. 

Татарстан Дәүләт Советы депутаты Таһир Һадиев Фатыйх Сибагатуллин белән эшләгән вакытларын искә алды, ә ТРның көрәш федерациясенең башкарма директоры Марсель Таһиров республикада тагын бер ярыш барлыкка килүенә сөенүен яшермәде, әлеге турнирның матур традициягә әверелеп китәчәк дигән өмете белән бүлеште. Казан энергетика көллияте директоры Азат Хәбибуллин бу ярышларның яшьләрне формалаштыруда зур роль уйнаячагына ишарәләде. Аның фикеренчә, шундый легендар шәхес истәлегенә багышланган чара яңа буын вәкилләрендә спортка мәхәббәт уятырга, традицияләрне сакларга һәм өлкәннәргә хөрмәт белән карарга ярдәм итәчәк. 

Реклама
erid:2Vtzqwy9AuJ erid:2Vtzqwy9AuJ

Шунысы куандыра, әлеге ярыш беренче тапкыр гына уздырылуына да карамастан, анда спортчылар күп җыелды. Әле кайбер олы түрәләр, район башлыклары, министрлык вәкилләре дә килергә тиеш булган дип сөйләделәр миңа, әмма алар бүген Тукай бәйрәмендә катнашу сәбәпле килә алмаганнар. Фатыйх Сәүбәнович аларга үпкәләмәс иде, чөнки үзе дә милләтпәрвәр булды, татарлар өчен янып торды.

Ярышның нәтиҗәләренә килсәк, командалар арасында 1 урынны Арча педагогика көллияте яулады, икенче урында Кукмара аграр көллияте калды, ә өченче урын Казан энергетика көллиятендә булды. Шәхси җиңүләрне барласак, 50 килограмм авырлыкта беренчелекне Казан нефтехимия көллиятеннән Әнвәр Җапаров алды, 60 килограммда – Арча педагогика көллиятеннән Динарис Таҗетдинов, 70 килограммда – Арча гуманитар-техник техникумыннан Ранель Хайретдинов, 80 килограммда – Казан энергетика көллиятеннән Илназ Шәмсиев, 90 килограммда – Арча педагогика көллиятеннән Данияр Моратов, 100 килограмм үлчәүдә шулай ук Арча педагогика көллиятеннән Илназ Хәкимуллов җиңүче булды. Казан энергетика көллиятеннән Илназ Шәмсиев әле “Манзара” спорт һәм музыка премиясеннән “Иң кызыклы көрәш өчен” кубогын да алды. Ярышлар бер сулышта үтте, яшьләр өлкәннәр кебек бер-берсен күтәрергә куркып. Келәм буйлап чабып йөрмиләр, тизрәк салырга гына торалар. Карарга күңелле булды, тамашачылар һәм катнашучылар үзләре дә бу хакта әйтә. Дәвамлы булыр дигән өметтә калыйк.

http://shahrikazan.ru/news/sport/archalar-berenche-urynga-chykty-yaki-yaa-krsh-bygese-turynda-kyskacha

Следите за самым важным и интересным в Telegram-каналеТатмедиа

Хәзер Арча һәм Арча районы яңалыкларын безнең Telegram-каналдан да белә аласыз

 

Реклама

Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Арча хәбәрләре