Арчаның алтынчы мәктәбе укучылары “Алгарыш” яшьләр үзәге белән танышты

Мәктәптән тыш тәрбия эшчәнлегенең мөһим юнәлешләренең берсе буларак, укучыларны иҗади һәм социаль мохиткә җәлеп итү бүген аеруча әһәмиятле. Шушы максаттан чыгып, Арчаның алтынчы мәктәбенең 6 “Б” сыйныфы укучылары “Алгарыш” яшьләр үзәге белән танышты.

Очрашу барышында укучылар өчен үзәк буенча экскурсия үткәрелде. Балалар биредәге мөмкинлекләр белән танышты: төрле түгәрәкләр, иҗат өчен махсус мәйданчыклар, аралашу һәм ял итү зоналары турында мәгълүмат алдылар.

Чараның икенче өлеше практик эшчәнлеккә багышланды. Укучылар өчен мини-кино күрсәтү оештырылды. Шулай ук төрле уеннар үткәрелде.

Чара ахырында укучылар “Алгарыш” яшьләр үзәге коллективына җылы кабул итүләре һәм файдалы вакыт үткәрү мөмкинлеге тудырулары өчен рәхмәт белдерделәр. Мондый очрашулар яшь буынның социаль активлыгын арттыруда һәм мәдәни мохиткә тартуда мөһим роль уйный.

“Улымның хис-кичерешләрен әйтеп бетерерлек түгел, экскурсия аңа бик ошаган”, – дип социаль челтәрләрдә үз фикере белән уртаклаша Зилә Гатауллина.