Арчаның күп профильле Г.Курсави ис. лицейда Белем бәйрәме

Арчаның күп профильле Г.Курсави ис. лицей бакчасында бик матур тантана булды. 1 сентябрь – Белем көнен билгеләп үттеләр. Башта иртәнге сәгать 8дә классларга җыелдылар. Аннан сәгать 9га бакчага тантананга чыктылар. Ә автобус йөрү расписаниесе алдан әти-әниләргә җиткерелде. Иртәнге сәгать 7 тулганда мәктәп автобусы Арча үзәгендә балаларны көтеп тора иде инде.  Аннан автобус район хастаханәсенә таба юнәлә... Менә шулай балаларны туплап, лицейга кайта.

Тантанада район башкарма комитеты җитәкчесе Ренат Гатиятов катнашты. “Мондый яхшы, заманча шартлар тудырылган лицей районда гына түгел, республикада да. берничә генә”, - дип сөйләде ул. Лицейда быел 517 бала белем алачак. Беренче сыйныфка 56 бала укырга кергән. Өч сыйныф. Матур итеп укытучылары белән мәйданга чыктылар, биеделәр.

Лицей директоры Максим Ильясов укытучыларга, балаларга уңышлар теләде. Яңа уку елында балаларга исән-сау булып тырышып укырга, ә укытучыларга балаларда укуга кызыксыну уятып, илебезгә лаеклы егетләр һәм кызлар тәрбияләргә насыйп булсын!