Башта аңлатабыз

– Безнең районда да төзекләндерү кагыйдәләрен бозучылар бар, – ди район административ комиссиясе рәисе Илдар Нотфуллин. – Йортлары янындагы территориядә төзелеш материаллары, чүп-чар, утын һ.б. калдыклар булган өчен шактый  беркетмәләр төзергә туры килә. Өең үзеңнеке булса да, капка төбе, янәшәдәге территория  синеке түгел. Синеке – койма эчендә.
Арча шәһәре муниципаль берәмлеге территориясен төзекләндерү кагыйдәләре нигезендә, йорт яннары территорияләрендә төзелеш материаллары, күмер, тара, утын, эре габаритлы калдыклар саклау, территорияне пычрату тыела. Авыл җирлекләрендә дә шундый ук кагыйдәләр кабул ителгән.
Чүп контейнерларына ватык кирпечләр, металл һәм бетон калдыклары, сүтелгән идән, дивар тышланмалары салу тыела. Тиешсез урында калдыклар калдырган өчен штраф түләгәнче, аларны тиешенчә чыгару чаралары күрегез.
Административ комиссия даими рәвештә рейдларга чыгачак, кагыйдәләрне бозучыларга карата беркетмәләр төзеләчәк. Штрафлар – 2000 сумнан 3500 сумга кадәр.