Фәрит Мөхәммәтшин Казанда яшәүче ике кызның Яңа ел теләкләрен үтәде

​​​​

Татарстан Дәүләт Советы Рәисе Фәрит Мөхәммәтшин Казанда яшәүче ике кызның — өч яшьлек Ясминә һәм дүрт яшьлек Айсельнең алсу велосипед һәм зур конструктор турындагы Яңа ел теләкләрен үтәде. Бу хакта республика парламентының матбугат хезмәте хәбәр итә.

Кызлар үз хыяллары турында «Теләкләр чыршысы» сайтында шул ук исемдәге бөтенроссия хәйрия акциясе кысаларында язганнар. Сәясәтче аларның мөрәҗәгатьләре салынган чыршы шарларын Дәүләт Советы бинасында урнаштырылган Яңа ел чыршысыннан алган.

Ясминә яшьтәшләре белән актив аралаша, җырларга һәм биергә ярата, балет классына йөри һәм велосипедта йөрергә өйрәнергә тели. Хәзер аның хыялы тормышка ашачак, чөнки Фәрит Мөхәммәтшин аңа бу транспорт чарасын бүләк итте.

Парламент башлыгы шулай ук конструкторлар җыярга яраткан Айсельның теләген дә үтәде. Ул аңа «Дөньядагы җәнлекләр» конструкторының зур җыелмасын тапшырды.

Бу юлы «Теләкләр чыршысы» акциясе 2024 елның 28 февраленә кадәр дәвам итәчәк. Анда махсус операциядә катнашучы хәрбиләрнең балалары, сәламәтлек мөмкинлекләре чикләнгән балалар, ятим балалар, аз керемле гаиләләрдән балалар, шулай ук Донецк һәм Луганск Халык Республикалары, Запорожье һәм Херсон өлкәләре территориясендә яшәүче балалар катнашты. Татарстаннан проект сайтына 1 меңнән артык бала үз хыялын юллады.

Акция кысаларында Россия Президенты Владимир Путин кыз балага үзен яңалыклар алып баручы ролендә сынап карарга, ә малайга Эрмитажда булырга ярдәм итте. Үз чиратында, Татарстан Рәисе Рөстәм Миңнеханов яшь татарстанлыларның «Ак Барс» хоккей командасы уенчылары белән очрашу хыялын тормышка ашырды һәм Лисичанскидан килгән малайга бүләк тапшырды. Шулай ук «Теләкләр чыршысы»нда республика Премьер-министры Алексей Песошин һәм Казан мэры Илсур Метшин катнашты

Тулырак: https://tatar-inform.tatar/news/farit-moxammatsin-kazanda-yasauce-ike-kyznyn-yana-el-telaklaren-utade-5881186