Кыр эшләренә әзерлек: «Казанка» хуҗалыгында техник карау узды

7 апрельдә Арча районындагы «Казанка» ширкәтендәә үзйөрешле машиналар һәм прицеплар өчен чираттагы еллык техник карау оештырылды. Бу хакта “Гостехнадзор“ның Арча районы буенча баш дәүләт инженер-инспекторы Габделхак Касыймов хәбәр итте.

“Тикшерүгә барлыгы 35 берәмлек техника тәкъдим ителде. «Казанка» агрофирмасы механизаторлары ел саен әлеге чарага җаваплы карый: техника алдан әзерләнә, кирәкле ремонт һәм көйләү эшләре вакытында башкарыла”, – дип билгеләп үтте ул.

Техни карауга тәкъдим ителгән машиналар билгеләнгән таләпләргә җавап бирә һәм техник карау узу турында таныклыклар алачак.

Чара барышында тракторчылар һәм механизаторлар белән аерым әңгәмә дә үткәрелде. Анда язгы кыр эшләре чорында куркынычсызлык кагыйдәләрен үтәү, юл хәрәкәте кагыйдәләренә игътибарлы булу мәсьәләләре күтәрелде. 2025 елда Татарстан Республикасы территориясендә теркәлгән юл-транспорт һәлакәтләре һәм бәхетсезлек очраклары мисал итеп китерелде, бу теманың әһәмиятен аеруча ассызыкланды.