Мактаганны яратмыйлар

Районда халык җыеннары, хисап җыелышлары бара. Шундый җыелышларның берсендә бер куштаны торып урындагы җитәкчене мактый башлаган. Менә эшләр гөрләп бара, без сезне яратабыз, бар да эшләнде, бернинди проблема калмады бездә, дип сиптерә икән бу.

Шуннан халык йокысыннан уянгандай дәррәү кабынып китә. Торып--торып проблемаларны әйтә башлыйлар. Нишләп безгә су юньләп килми, урам юллары да урыны--урыны белән үтәрлек түгел, утны да иртә сүндерәләр...

Икенче җыелышта теге куштан дәшми. Аның җыелышларда дәшми калганы юк иде. Урындагы җитәкчелек алдан бәлки әйтеп куйгандыр, аңа сүз бирмәскә, дип. Ул мактаса,  тагын дәррәү тәнкыйть сүзләре китәр дип, шүрләгәннәрдер.