Оешмаларга рейд үткәрелде: коронавирус инфекциясенә каршы чаралар үтәләме?

Коронавирус инфекциясе колач җәйгән чорда эшләүче район оешмалары нинди саклану чаралары күрә? Оешмаларга чыгып, тикшерү эшләре башланып китте. Кичә Арча муниципаль районының финанс һәм икътисад бүлеге җитәкчесе Илшат Нәбиуллин, административ комиссия баш белгече Илдар Нотфуллин, Татарстан Республикасы буенча Распотребнадзор идарәсенең Биектау территориаль бүлеге баш белгеч-эксперты Лилия Галләмова Арча оешмаларына чыктылар. Аларда кануннар (предписание) буенча нәрсәләр үткәрелүен тикшерделәр.

– “Арча нефть продуктлары” җәмгыяте, “АСПК” оешмасы” “КСМ” ширкәте”, ”Арча элеваторы” җәмгыяте, “Арча сөт комбинаты”нда булдык. Нигездә, кушылган таләпләр үтәлә. Дезинфекция ясау чаралары белән аңлашылмаучылык туган. “Белизна” кулланалар. Тик ул дезинфекция ясау өчен түгел. Монда “Астера”, “Диахлор”, “Ника”, “Хлоромин” кебек составында хлор булган махсус раствор кулланырга кирәк. Алар “Айракс” кибендә бар. Кирәк икән алып кайтып бирәләр, – диде Лилия Галләмова..