Районыбызда “Моңлы сазым” исемле районкүләм әдәби-музыкаль конкурс уздырылды

Г. Тукай дөньяда бары тик 27 ел гына яшәп,  8 ел гына иҗат иткән. Шулай булса да ул татар халкы өчен гаять зур, бәя биреп бетермәслек рухи байлык калдырган. Аның тормышы һәм иҗаты - халкыбыз тарихында иң якты, иң изге сәхифәләрнең берсе. Балачактан күңелләребезгә кергән Тукай безне гомеребез буена озата бара. Бүгенге көндә дә аның әсәрләре яратып укыла.
       "Казан арты" музеенда шулай ук ел саен апрель аенда  сөекле шагыйребезне искә алып, “Моңлы сазым”исемле иҗат бәйгесе оештырылып килә.  Бүген, 20  апрельдә,  “ Казан арты” тарих-этнография музеенда “Моңлы сазым” исемле районкүләм әдәби-музыкаль конкурс уздырылды.  Иҗади бәйге 3 номинациядә узды: 
-Г.Тукайның шигъри әсәрләрен укучылар; (шигырь)
-Г.Тукай сүзләренә иҗат ителгән җырларны башкаручылар; (җыр)
-укучыларның Г.Тукайга багышлап яки аның иҗатына ияреп язган шигъри әсәрләре; (иҗат)
“Моңлы сазым” исемле районкүләм әдәби-музыкаль  бәйгедә 60 тан артык   районыбызның иң көчле укучылары  көч сынашты.   Ахырдан конкурска нәтиҗә ясап, җиңүчеләргә диплом һәм истәлекле бүләкләр тапшырылды.    
Музей хезмәткәрләре катнашкан укучыларга һәм аларны әзерләгән укучыларга бик зур рәхмәтен җиткерә!

Газетабызның 28 апрель санында әлеге чара турында тулырак язачакбыз.