Үткән белән очрашу – киләчәккә юл ачучы күпер

Арча педагогика көллиятендә узган бу чара гадәти очрашу кысаларында гына калмады, ә төрле чорларны тоташтыручы мәгънәле аралашу мәйданына әверелде. Биредә яшь буын вәкилләре педагогика һәм тәрбия өлкәсендә зур тәҗрибә туплаган шәхесләр белән турыдан-туры сөйләшү мөмкинлеге алды. Бу хакт район матбугат хезмәте хәбәр итә.

Очрашуда катнашкан кунаклар арасында Илдус Сагдиев, Владимир Дергунов, Асия Яруллина (Маликова), Семен Федоров, Таһир Сабиров, Гөлсум Шагиева (Урманова), Әминә Җәләтдинова, Рузалия Вәлиуллина кебек озак еллар дәвамында балалар һәм яшүсмерләр белән эшләүгә багышланган шәхесләр бар иде.

Алар үз чыгышларында узган гасырның төрле чорларында тәрбия эшенең ничек оештырылуы, пионер һәм комсомол оешмаларының яшьләр тормышында тоткан урыны турында сөйләделәр.

Чара барышында яңгыраган фикерләр узган еллар тәҗрибәсе бүген дә әһәмиятен югалтмавын күрсәтте.

Очрашу җылы, ихлас мохиттә узды. Ветераннарның тормыш тәҗрибәсе, акыллы киңәшләре яшьләргә уйлану һәм үз юлларын билгеләү өчен әһәмиятле этәргеч бирде.