Яңгыр да өркетмәде

Арча шәһәренең “Шәрык” территориаль-җәмәгатьчелек үзидарәсе рәисе Ринат Сафин кызыклы идеяләрне уйлап табып кына тора. Узган шимбәдә үзәк стадионда мини-футбол буенча Арча шәһәре муниципаль берәмлеге призына узган ярышларның да башлангычында ул тора.

Иртәдән көн кояшлы, матур иде. “Барысы 9 команда катнаша, минем якташлар – Мирҗәм егетләре дә килде”, – диде Ринат Сафин.

Ачу тантанасында район яшьләр эшләре һәм спорт бүлеге җитәкчесе Ильяс Габделгазизов һәм Ринат Сафин тәбрикләү сүзләре әйттеләр. Мондый уеннар беренче тапкыр уздырыла һәм ул киләчәктә традициягә әвереләчәк, диделәр.

Егетләр матур уен күрсәтте, көрәш киеренке барды. Ярымфинал, финал уеннары яңгыр астында үтте. Күчмә кубокны “Арча-металл” ширкәте командасы алды. “Станция” командасы – икенче, Теләче районының “Комаровка” командасы өченче урынны алды.

Реклама

Ильяс Сәхәпов