Үземә үзем чәчәкләр сатып алам

- Сез чәчәк бирер кешең булу бәхет бит ул, дип язгансыз. Бу очракта мин нинди кеше инде: минем үземнең дә чәчәк бирер кешем юк һәм миңа да чәчәк бирер кеше юк. Мин бәхетсез булып чыгаммы?

Шалтыратучы шундый сорау куйды.

- Сез ялгыз кешеме? - дип сорадым.

- Юк. Ирем бар. Балалар еракта. Мин сезне гаепләмим. Бик дөрес язгансыз. Мин үзем чәчәкләрне бик яратам. Шуңа кибеткә чыгып, үземә үзем чәчәкләр сатып алам. Ирем чәчәк ише әйберне аңламый. Чәчәк күтәреп кайткач, нәрсәгә акча туздырдың, үзеңә берәр кирәкле әйбер аласың калган диде. Мин сезгә чәчәкләрне ватсап аша салам. Нинди матурлар бит алар... мин хатын-кызларга шуны әйтәсем килә: чәчәкләр яратасыз икән, чәчәк бүләк итүче булмаса, тотыгыз да үзегезгә үзегез чәчәкләр сатып алыгыз.

Бәйрәм белән!