Арчалар Теләчедәге Китап бәйрәмендә катнашты

Анда арчалыларның  якын дустына әверелгән Сиренә Гатиятованың “Гомерем келәме” исемле шигырьләр җыентыгы басылып чыгу уңаеннан Китап бәйрәме уздырдылар. Сиренә үзе Арчаның “Каурый каләм” әдәби-иҗат берләшмәсе белән байтактан хезмәттәшлек итә. Әле күптән түгел генә районыбыз шагыйрьләре Дамир Нуриәхмәтов, Марсель Шәрәповларның иҗат кичәләре һәм юбилей тантаналарында шатлыкларын уртаклашып, моңлы җырларын бүләк итеп киткән иде Сиренә. Арча үзәк китапханәсендә, Ахун чишмәсендә, Сарай-Чокырча авылы мәдәният йортында уздырылган очрашуларда да теләп катнашты ул.

    Берләшмә җитәкчесе Халидә Фәйзрахманова, популяр шагыйрә Гөлара Шәрипова, Дамир Фәтхрахманов, Факия Шәрәфетдинова, Альбина Вәлиевалар Теләче районы иҗатчылары белән очраштылар, яңа китап авторын  котладылар һәм бүләкләр тапшырдылар.

    Республикабыз районнары арасында  әдәбият, сәнгать өлкәләрендә дустанә мөнәсәбәт җепләре киләчәктә дә өзелмәсен иде
Халида Файзрахманова