Гаилә ныклыгы - ил тынычлыгында

Югары Аты мәктәпкәчә белем бирү учреждениесендә 23 нче февраль көне ярыш-кичә итеп үткәрелде. “Алар – безнең горурлыгыбыз” дип аталган бу бәйрәмгә балаларның әти-әниләре, әби-бабайлары кунак итеп чакырылды. Дәү әтиләр арасында  Әфган сугышы ветераннары - Хәлим Гаделша улы Вильданов, Ринат Мансур улы Нуриев та бар иде.

Ярыш-кичәдә балалар үзләренең әтиләре белән көч сынаштылар. Ике команда да  һәр яктан тапкыр, җитез һәм өлгер булганлыкларын күрсәтте. Нәниләр патриотик рухтагы шигырьләр сөйләделәр; җырлар башкардылар; зур алкышлар астында биеп, кунакларның күңелен күрделәр. Әфганчы дәү әтиләр балаларга файдалы кинәшләрен җиткерделәр. Дәү әниләр һәм әниләр үзләренен алкышлары белән ярышта катнашучыларга көч биреп тордылар.

Бәйрәм буе балалар йөзеннән шат елмаю китмәде. Ул шатлык әти-әниләр йөзенә күчте. Килгән кунаклар да, сабыйлар да  бик бәхетле иде. “Илебез генә тыныч булсын! Авылыбызда сабыйлар тавышы беркайчан тынмасын! Бәхетле гаиләдә генә бәхетле балалар туа бит”,   - дигән теләктә тәмамланды бу бәйрәм.

                                                                                 Айсылу Хурамшина, Дилә Вильданова, Югары Аты балалар бакчасы.