Күрешүләр рәхәт, рәхмәт

Безне, ветераннарны, Арчаның 3нче мәктәбендә бик ачык йөз белән каршы алдылар. Башта концерт карадык. Җыр-биюдән тыш, ел фасылына туры китереп саф татар телендә “Уңыш җыю” әкиятен күрсәттеләр. Балалар үз рольләрен бик тырышып башкардылар. Укучыларның осталыгына сокланып утырдык, үзләрен алкышларга күмдек.

Очрашу мул өстәл артында дәвам итте. Без үзебезнең хис-тойгыларны сүзләр белән генә түгел, җырлап та әйтеп бирдек. Баян белән килгән хезмәттәшебез Дамир Таҗиев табынны һәрвакыттагыча җанландырып җибәрде. Килә алмаган хезмәттәшләребезне дә искә алып, мәктәп тормышыннан кызыклы вакыйгаларны сөйләшеп, дусларча җылы мохиттә ял иттек.

Белем көнендә дә бер төркем ветеран укытучылар мәктәпкә килеп, коллективны яңа уку елы белән котладык. 
Рәхмәт очрашуны оештыручыларга. Без бик канәгать булдык. Алдагы елларда да шундый матур очрашулар булып торсын иде, дигән теләктә калабыз.

Наилә Миңнемуллина,
ветеран укытучы