1 марттан авиакомпанияләр очу кагыйдәләре турында пассажирларга алдан хәбәр итәргә тиеш

1 марттан Россиядә авиакомпанияләр пассажирларга очыш шартлары, билетны үзгәртү һәм акчаларны кире кайтару тәртибе турында алдан тулы мәгълүмат бирергә бурычлы булачак

1 марттан Россиядә һава йөртү кагыйдәләренә кертелгән үзгәрешләр үз көченә керә. Яңа таләпләр нигезендә авиакомпанияләр пассажирларга очышның барлык шартларын, билетны үзгәртү кагыйдәләрен һәм акчаларны кире кайтару тәртибен алдан аңлатырга тиеш булачак. Бу хакта Дәүләт Думасы депутаты Александр Якубовский белдерде, дип хәбәр итә РИА Новости.

Аның сүзләренчә, үзгәрешләр Россия Транспорт министрлыгының 341 нче боерыгы белән расланган һәм авиакомпанияләрнең пассажирлар алдында мәгълүмати бурычларын беренче тапкыр җентекләп билгели.

Яңалыкларның аерым өлеше балалы гаиләләргә кагыла. 12 яшькә кадәрге балаларга һәм аларны озата баручы өлкәннәргә өстәмә түләүсез янәшә урыннар бирү мәҗбүри булачак. Шулай ук әлеге урыннарны бирү тәртибе дә төгәл билгеләнә.

Моннан тыш, әгәр рейс билетта күрсәтелгән вакыттан 30 минуттан артыкка тоткарланса, пассажир очыштан мәҗбүри баш тарткан очракта акчаларын кире кайтару хокукына ия булачак. Авиакомпанияләр пассажирларны су, туклану һәм озак тоткарлыклар булганда вакытлыча урнаштыру белән тәэмин итәргә дә тиеш.

Депутат фикеренчә, әлеге үзгәрешләр пассажирларның хокукларын аңлаешлырак итәчәк, ә авиакомпанияләр өчен бурычларны ачык һәм төгәл итеп беркетәчәк. Бу исә конфликтлы хәлләрне киметүгә юнәлдерелгән.