Ана капиталының калган өлешен ничек алырга?

Хәтерләсәгез, Россия Президенты Владимир Путин әлеге тәкъдимне бу җәйдә гаиләләр белән очрашканда җиткерде. «Ана капиталының төп өлешен файдаланганнан соң, аз гына күләмдә акча калырга мөмкин. Аның белән бер нәрсә дә эшләп булмый. Шуңа күрә әлеге сумманы әти-әниләргә түләп бетерү җаен табарга кирәк», – диде Илбашы. Аның әйтүенчә, сүз әлегә ана капиталында калган ун мең сум һәм аннан да кимрәк акча турында бара. «Аннары күз күрер», – дип тә өстәде Президент.

Озын сүзнең кыскасы: Социаль фонд әлеге төр түләү тиешле гаиләләргә бу хакта үзе хәбәр итәчәк. Сертификат хуҗасына «сәлам хаты» Дәүләт хезмәтләре порталы аша киләчәк. Анда инде өлешчә тутырылган гариза да беркетеләчәк. Әлеге документка кирәкле мәгълүматны язып бетереп, кире җибәрәсе генә кала. Гаризаны шунда ук Дәүләт хезмәтләре порталыннан, күпфункцияле үзәк яки почта бүлекчәсе аша юлларга мөмкин. Калган акча, фонд аны түләү турында карар кабул иткәннән соң, биш көн эчендә әти яки әнинең гаризада күрсәтелгән исәп-хисап счетына күчәчәк.

Түбән Камада яшәүче Әлфия һәм Артур Шәриповлар ана капиталын ипотекага «салган».

– Ана капиталы ярдәмендә фатир өчен бурычны түләп бетердек, – ди гаилә башлыгы. – Сертификатның 5–6 мең сумы артык та калды әле. Тик ята әнә. Аны түләп бетерсәләр, бик яхшы булачак. Балалы гаиләдә акча барыбер беренче чиратта аларга тотыла инде.

Билгеле булганча, ана капиталы программасы илдә 2007 елдан бирле гамәлдә. Баштарак аны гаиләдәге икенче сабыйга гына бирсәләр, 2020 елдан ярдәм чарасын тәүге тапкыр әти-әни булучылар да ала башлады. Әлеге акчаны торак шартларын яхшырту, балаларга белем бирү, әнинең булачак пенсиясе өчен, инвалид баланы социаль адаптацияләү өчен товарлар (хезмәтләр) сатып алуга һәм аз керемле гаиләләргә өч яшькә кадәрге балага айлык түләү өчен тотарга мөмкин. Программа 2026 елга кадәр гамәлдә.

2024 елда ана капиталы күләме

– Беренче бала 2020 елга кадәр туган яки уллыкка алынган, икенче бала 2020 елда яки соңрак туса – икенчесенә 833024,74 сум.

– Балаларның икесе дә 2020 елга кадәр туган булса – икенчесенә 630380,78 сум.

– 2020 елның 1 гыйнварыннан соң туган бердәнбер балага – 630380,78 сум.

– 2020 елның 1 гыйнварыннан соң туган беренче балага – 630380,78 сум, икенчесе тугач – 202 643,96 сум.

– Беренче һәм икенче бала 2007 елга кадәр туган, ә өченчесе 2020 елда яки соңрак туса – өченчесенә 833024,74 сум.

Чыганак: https://vatantat.ru/2024/09/151807/
© Ватаным Татарстан