Каникулда эшләгән яшүсмерләргә мәшгульлек үзәге аша 2 650 сум күләмендә финанс ярдәм түләнә

Татарстан Республикасының мәшгульлек үзәге 14 яшьтән 18 яшькә кадәрге балигъ булмаганнарны җәйге каникул вакытында һәм укудан буш вакытта вакытлыча эшкә урнаштыруны оештыра. Бу хакта Татарстан Республикасы Хезмәт, халыкны эш белән тәэмин итү һәм социаль яклау министрлыгының матбугат хезмәте хәбәр итә.

Ярдәмче эшчеләр, хезмәт биналарын җыештыручылар, урам себерүчеләр, шәһәрнең патриотик юнәлештәге чараларында, авыл хуҗалыгы эшләрендә һәм мәктәп яны участокларында эш башкару – балигъ булмаганнар өчен хезмәтләр. Җәй ахырына 11 567 яшүсмернең  мәшгульлек үзәге тарафыннан эшкә урнашканлыгы билгеле.

РФ Хезмәт кодексы нигезендә эш бирүчеләр яшүсмерләргә хезмәт хакын минималь хезмәт хакыннан түбән булмаган дәрәҗәдә түли. Моннан тыш, каникулда эшләгән яшүсмерләргә мәшгульлек үзәге аша  ай саен 2 650 сум күләмендә финанс ярдәм түләнә. Төп шарт – ул мәшгульлек үзәге аша эшкә урнашкан булырга тиеш. 

Исегезгә төшерәбез, яшүсмерләрне эшкә урнаштыру «Татарстан Республикасы халкын эш белән тәэмин итүгә ярдәм итү» дәүләт программасы кысаларында оештырыла, ул «Кадрлар» илкүләм проекты кысаларында гамәлгә ашырыла.

Чыганак: Татар-информ