Казанда начар күрүчеләр өчен “Ак китап” инклюзив проекты гамәлгә ашырыла башлый

Бүген, 23 мартта, 12 сәгатьтә Татарстан Республикасы Милли китапханәсендә “Ак китап” инклюзив проектының рәсми ачылышы узачак. Чара XIX Халыкара “Алтын ташбака” кыргый табигать фестивале кысаларында үткәрелә, әлеге фестиваль 12 марттан 26 апрельгә кадәр дәвам итә, дип әбәр итә “Татар-информ”.

“Ак китап” проекты – социаль юнәлешле әһәмиятле инициатива. Ул 2019 елдан гамәлгә ашырыла һәм начар күрүчеләргә табигать дөньясын башкача тоемлау мөмкинлеге бирә. Күргәзмәдә тәкъдим ителгән фотоработалар махсус 3D-тактиль технологиясе ярдәмендә эшләнгән. Бу алым тамашачыларга сурәтләрне кул белән тоеп “карау” мөмкинлеген тудыра.

Проект кысаларында махсус адаптацияләнгән экскурсияләр каралган. Белгечләр билгеләп үткәнчә, тактиль рәвештә кабул ителгән мәгълүмат катлаулы биологик бәйләнешләрне яхшырак аңларга ярдәм итә, уку процессын нәтиҗәлерәк һәм истә калырлык итә.

Чарада 500дән артык кеше – балалар һәм өлкәннәр – катнашуы көтелә. Ачылыш тантанасында балалар хоры һәм вокал башкаручылар чыгыш ясаячак. Шулай ук рәсми кунаклар тарафыннан сәламләү сүзләре яңгыраячак.

Программа ахырында катнашучылар өчен экскурсияләр һәм иҗади осталык класслары оештырыла. Проектны гамәлгә ашыруда махсус китапханәләр, иҗтимагый оешмалар һәм социаль реабилитация үзәкләре катнаша.