Мәскәүдә көчле яңгыр вакытында һәлак булучылар бар

Кайбер урыннарда боз яуган. Күзачкысыз яшенле яңгыр вакытында Подольск, Апрелевка шәһәрләре ягына таба поездлар хәрәкәте туктатып торылган. Курск вокзалында электрүткәргечләргә зыян килүгә бәйле бу. Моннан тыш метрода өзеклекләр күзәтелгән. Башкаланың транспорт департаментында билгеләп үтелгәнчә, Таганск-Краснопресненск линиясенең көньяк-көнчыгыш өлешендә метро юлына агач ауган. Шул сәбәпле поездлар сирәк йөри башлаган. 

  Mash телеграм-каналы хәбәренә караганда, Мәскәүдә давылдан 3 кешегә зыян килгән. Канал мәгълүматларына караганда, Вешняки һәм Северное Медведково районнарында 2 кызның аягына агач ауган. Өченче кешенең ничек җәрәхәтләнүе турында мәгълүматлар юк. Мәскәү янындагы Щелково бистәсендә исә агач аву фаҗига белән төгәлләнгән. Анда бер ир-ат һәм 9 яшьлек бала һәлак булган. Әлеге очрак буенча тикшерү оештырылган. Башлангыч мәгълүматларга караганда, ир-ат оныгы белән яңгырдан агач астына кереп яшеренгән булган. “Ир-атның оныгы белән парк аша пляждан кайтышы булган. Шулчак көчле җил чыгып, яңгыр ява башлаган. Алар агач астына кереп яшеренгән. Ир-ат белән бала өсләренә агач авудан һәлак булган”, – диелгән хәбәрдә. 

Чыганак: https://vatantat.ru/2024/06/144623/