Татарстанда һөнәрчеләр җитештергән кайбер товарлар маркировкадан азат ителде

Татарстанда һөнәрчеләр тарафыннан җитештерелә торган продукциянең бер өлеше мәҗбүри идентификация чаралары белән маркировкаланмаячак. Әлеге карар Татарстан Хөкүмәте тарафыннан расланды. Аны республика Премьер-министры Алексей Песошин имзалады.

Рәсми документта һөнәрчелек эшчәнлеге субъектлары җитештергән һәм маркировка таләп ителми торган эшләнмәләр исемлеге билгеләнгән. Исемлеккә, беренче чиратта, төрле кием-салым төрләре кертелгән. Алар арасында табигый һәм композицион күннән тегелгән киемнәр, шул исәптән эш киемнәре дә бар. Моннан тыш, трикотаж блузкалар, пальто, ярымпальто, плащ, төрле фасондагы курткалар, шул исәптән чаңгы курткалары да әлеге категориягә карый.

Исемлектә шулай ук ир-ат һәм хатын-кыз күлмәкләре, шәлләр, шарфлар, галстуклар, спорт һәм чаңгы костюмнары, пиджаклар, чалбарлар, комбинезоннар, юбкалар, свитерлар, кардиганнар һәм башка көндәлек кием үрнәкләре дә урын алган. Балалар киеме, эчке кием, йокы киемнәре, коену костюмнары, оекбашлар, перчаткалар, баш киемнәре дә маркировкадан азат ителә.

Карарның үтәлешен контрольдә тоту Татарстан Республикасы Икътисад министрлыгына йөкләнгән.