Татарстанда «Яшәү өчен инфраструктура» буенча эшләр актив бара: 2877 яңа юл билгесе урнаштырылды

«Яшәү өчен инфраструктура» илкүләм проекты кысаларында Татарстанда юл хәрәкәте иминлеген ныгыту буенча зур эшләр башкарыла. Проект максаты – җәяүлеләр һәм транспорт өчен уңайлы, куркынычсыз шәһәр мохите төзү.

Узган ел эчендә республиканың проект объектларында иминлеккә юнәлдерелгән күпсанлы төзекләндерү эшләре гамәлгә ашырылды. Алар арасында:  2877 яңа юл билгесе куелу,  11,6 км озынлыктагы барьер һәм 3,8 км җәяүлеләр киртәсе урнаштыру,  20 җәяүлеләр кичүе төзекләндерү, 8 847 ясалма яктырту элемтәсе һәм 2470 юл сигнал баганасы урнаштыру, 18,8 км тротуар һәм 4,5 км велосипед юлы кору, 35 ясалма тигезсезлек, 53 тукталыш пункты кору. Бу хакта Татарстанның Транспорт һәм юл хуҗалыгы министрлыгына сылтама белән “Татар-информ” хәбәр итә.

Шулай ук 2025 елда Казан һәм Яр Чаллы шәһәрләренең төп урамнарында юл хәрәкәте белән идарә итүне автоматлаштыруга аерым игътибар бирелде. Хәзергә җирле вакытта юлдагы йөкләнешкә яраклашып эшләүче 19 светофор эшли – 13се Казанда, 6сы Яр Чаллыда. Бу система (АССУД) юл-транспорт вакыйгаларын киметүгә һәм барлык хәрәкәт итүчеләр өчен уңайлылыкны арттыруга ярдәм итә.

«Юл хәрәкәте иминлеген тәэмин итү – республикабызның өстенлекле юнәлешләренең берсе. Соңгы елларда юл инфраструктурасын яхшырту буенча саллы эшләр башкарылды. Болар барысы да халкыбызның иминлеге һәм уңайлыгы өчен. Бу эш быел да туктаусыз дәвам итәчәк», – дип билгеләп үтте Татарстан Транспорт һәм юл хуҗалыгы министрлыгы урынбасары Рәнис Фәйзуллин.

Проект чараларының нәтиҗәлелеге түбәндәге күрсәткечләрдә чагыла: шәһәр агломерацияләрендә нормативларга туры килгән юл челтәренең өлеше 90,46% ка җитте, ә төбәк әһәмиятендәге автомобиль юлларының яхшы хәлендәге өлеше 85% тан артып китте.

Яңартылган инфраструктура шәһәрләрне кешеләр өчен яшәнергә уңайрак итуне максат итә.

85,18 процент.