Укучыларга дигән 635 тоннан артык продукт сыйфатсыз дип табылган

Казанда мәктәпләрне ашамлык белән тәэмин итүчеләргә 635 тоннан артык сыйфатсыз продукт кире кайтарылган. Бу хакта «Татар-информ» мәгълүмат агентлыгында үткән матбугат конференциясендә азык-төлек һәм социаль туклану департаменты генераль директор урынбасары Алла Агапова хәбәр итте.

«Департаменттагы барлык ашамлыклар тикшерелә. Безнең үзебезнең лабораториябез бар. Ул куркыныч тудырган сыйфатсыз ашамлыкларны ачыкларга ярдәм итә», — ди Алла Агапова.

Агапова сүзләренчә, Татарстанда укучылар дөрес туклануга караганда, зыянлы ризык ашауны өстен күрә. «Әти-әниләр үз балаларында тумыштан бирле дөрес туклануга гадәт булдырырга тиеш», — диде генераль директор урынбасары.

«Мәктәп менюлары балаларга кирәк һәм файдалы булган ризыклардан тора», — дип өстәде ул.

Татар-информ

Салават Камалетдинов