Арчага йолдызлар иленнән бүләк килде

Районда шундый кызыклы шәхес яши. Аның белән аралашкач, хисләр дөньясына күмелеп, күктән, җиһаннан “төшә” алмыйча шактый йөрисең. “Арча” радиосында даими чыгып килүче җиһан серләренә бәйле тапшыру кунагы Хәлил Шәйхнур улы Гайнетдинов ул. Җиһан, космос турында күп кенә язмалар, китаплар авторы, заманында республикадагы данлыклы “Сәләт” лагерена нигез салучыларның берсе.

Шушы көннәрдә ул редакциягә тагын бер шатлыклы хәбәр алып керде — 6 гыйнвар көнне бәйрәм күчтәнәче — посылка килеп төшкән үзенә. Кайдан дисезме? Әлбәттә, йолдызлар иленнән. Ул турыда менә ниләр сөйләде ул:

• Данлыклы Йолдызлы шәһәрчектән, космонавтлар әзерли торган дөньякүләм үзәктән почта аша посылка килеп төште.  Мине Яңа ел һәм Раштуа бәйрәмнәре белән котлап, шушы үзәктә эшләүче һәм яшәүче  якын дусларым, милләттәшебез Айдар Бикмучев һәм Татарстанда туган бердәнбер космонавт, Россия Герое Сергей Рыжиков жибәргән. Посылка эченә Сергей Рыжиковның 2020 елга изге теләкләр теләп язган календаре, Айдар Бикмучевның Байконур космодромына багышланган бай эчтәлекле китабы, бүгенге көндә Җир тирәсендәге орбитада урнашкан Халыкара Космик Станциясенең Жиһандагы эшлэрен башкара торган космонавтлар: Россиядән А.Скворцов, Америкадан Э.Морган, Италиядән Л.Пармитаноның шәхси имзалары белэн фотосурәте һәм Яңа ел бүләкләре сыйган.

Сергей Рыжиков бүләк елнамәсенә: "Халиль! Поздравляю с новолетием! Пусть будет больше поводов для радости! С поклоном землякам!", — дип изге теләкләре белән имза салган.
Мин бүләкләр өчен рәхмәт хаты язгач, ул туган ягына, Татарстанга кунакка кайту мөмкин булуы турында да әйтеп язды.

Арча үзәк стадионында Җиһангирлар аллеясы барлыгын район халкы белә. Аллея бер төркем энтузиазистлар белән бергәләп 2016 елның 19 октябрендә, Сергей Рыжиков жиһанга очкан конне ачылды.

Якташыбыз Сергей Рыжиков 1974 елның 19 августында Бөгелмәдә туган, ә Айдар Бикмучев Әлмәт районының Кичүчат авылыннан. Ул космонавтларны " Союз" космик корабында Жиһанга очарга һәм Җиргэ кире кайтырга өйрәтә, инструктор буларак әзерли һәм уңышлы нәтиҗә өчен җавап бирә.