“Әти заманыннан алдырабыз”

Бер ай элек игълан иткән “Якыныңа бүләк яса: газетага яздыр” акциясе ахырына якынлаша. Кызганыч, акциягә кушылучылар күп түгел. Алар белән газетабыз битләрендә таныштырып барабыз.

Шуларның тагын берсе – Өчиле авылыннан Булат Әкъмәлиев. Булат – Әтнәдә белем алучы студент. Ул үзенең бабайсы Зөфәр Әкъмәлиевны киләсе елның беренче яртыеллыгына “Арча хәбәрләре” газетасына һәм ул яратып укый торган тагын берничә газетага яздырган. 

“Район газетасын әти заманыннан алдырабыз. Һәр санын укып барам, калдырганым юк. Бу юлы оныгым, бүләк ясап, үзем яздырам, диде. Рәхмәт инде аңа. Әбием белән ике кыз, бер малай тәрбияләп үстердек. Бүгенге көндә җиде оныгым, бер оныкчыгым бар. Кызганыч, әбием генә юк янымда. Улым, киленем, оныкларым белән матур итеп яшибез”, – диде быел 78 яшен тутыручы тугры укучыбыз. Өлкән буынга ихтирам һәм игътибар күрсәтүче шундый яшьләр булганда, киләчәкнең якты буласына шик юк. 

      Фотода Зөфәр Әкъмәлиев икенче оныгы Эмиль белән.