Бал да күп, уңыш та яхшы булыр

Бал кортларының агулануы турында башка урыннарда да ишетергә туры килде. Әйбәт кышлап чыккан корт семьясы җәй башында көчәеп, инде бал белән сөендерә дигәндә бер-ике көндә юкка чыгуы умарта өчен зур югалту.

Быел Мөрәле авылы янындагы ике басуга рапс чәчеләсен белгәч бал кортларына башка җирләрдәге кебек зыян килмәсме дип, борчылып йөрдем. Борчылулар юкка булган, башка елларга караганда күпкә артык бал суырттым. Кортлар рапска очты. Алар бал җыю белән бергә, аны серкәләндерделәр, күпмедер уңышын арттырдылар. Сарык та исән, бүре дә тук кебегрәк инде.

“Ак барс” агрокомплексы” ширкәте баш агрономы, авыл хуҗалыгы фәннәре кандидаты Рөстәм Мөхәммәдиевка хезмәтне дөрес оештырганы өчен Кесмәс буе умартачыларыннан зур рәхмәт!

Исламгали Миңһаҗев

Редакциядән: Рөстәм Харис улының үзе белән дә элемтәгә кердек. “Без препаратларны рапс чәчәк атканчы сиптек, – диде ул. – Болай эшләгәндә бал кортларына зыян килми”.