Арск-Информ
  • Рус Тат
  • Бүген ашыгыч ярдәм күрсәтүче медицина хезмәткәрләре көне

    Әле яңа гына Арчада район үзәк хастаханәсенең ашыгыч ярдәм бүлегендә булдык.

    Барысы өлкән фельдшер Мәдинә Сәләхова белән 14 фельдшер алар. Һәм 5 машина йөртүче.

    Район үзәк хастаханәсен ныклап төзекләндергәннән соң, яңа урынга күчтеләр.

    - Монда уңайлы, - диләр. -  Авыруны шок хәленнән чыгару, томография, лифт - бар да янәшәдә. 

    Өлкән фельдшер Мәдинә Фоатовна 19 ел инде шушы бүлектә. 12шәр ел эшләүчеләр бар.

    - Хезмәтегез авыр, туйдым, китәм дигән көннәрегез буламы? - дип сорыйм.

    - Юк, -- диде Резедә Шакирҗанова. - Авыруларга ашыгыч ярдәм күрсәтү - бу безнеке. 

    Көннең һәм төннең теләсә кайсы вакытында авыруларга ярдәм күрсәтергә чыгып чабарга кирәк.

    - Безнең авыруга ярдәм күрсәтер өчен мөмкинлекләребез бар, - дип сөйли Мәдинә Фоатовна. - Фельдшерлар үзләре урынга баргач, авыруга ЭКГ төшерәләр, нәтиҗәне укый беләләр, беренчел ярдәмне күрсәтәләр. Кирәкле дарулар бар.

    Алар өчен иң зур батырлык - авыруга тиешле ярдәмне күрсәтү, авыр хәлдәгеләрне үлемнән алып калу. 

    Әмма бик авыр вакытлар да була...

    Реклама

    -- Тромба тыгылып, авыруны алып кала алмаган чаклар да була. Яшь кеше, хатыны, балалары елый, без елый-елый авыруны үлемнән алып калырга тырышабыз... Бик кызганыч...

    - Ә балалар үлеме?

    - Сирәк булса да булгалый. 6 айлык бер бала косыгына тынчыгып үлде. Балалар үлеме аварияләрдә булгалый. Гомумән, аварияләрдә еларга вакыт булмый, соңыннан авыр була...

    -Бүгенге коронавирус белән бәйле махсус режим вакытында ничек эшлисез?

    - Температура дип шалтыраталар икән, табиб катнашында махсус саклану киемнәре киеп авыру янына барабыз. Тикшерәбез, анализ алабыз, тиешле ярдәмне күрсәтәбез.

    - Ашыгыч ярдәм сорап шалтыратучыларга теләкләрегез.

    - Шалтыраткач, җентекләп сораштыруларга ачуланмасыннар. Тәртибе шундый. Без килгәнче авыруга тиешле ярдәмне күрсәтә торсыннар дип сораштырабыз.

    Тулырак итеп район газетасында язарбыз.

    Без ашыгыч медицина ярдәме күрсәтүчеләргә исәнлек-саулык, эшләрендә уңышлар телибез.

     

     

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: