Россия кешесе 20 ел полякларда коллыкта булган

автор, 26 сентябрь 2020 - 08:22

1286

Россия гражданы Николай Ерофеев 20 ел Польшада бер фермерда коллыкта яшәргә мәҗбүр булган.

Россия кешесе 20 ел полякларда коллыкта булган

Ул бу илгә 1989 елда килә. Болеславец шәһәре янындагы хәрби частьларның берсенә эшкә урнаша. 90нчы елларда безнең гаскәрләрне Польшадан чыгара башлагач, Николай чит илдә калырга карар итә.

Коллыкка эләгүен сизми дә кала Ерофеев. Ул эшкә ялланырга бер фермер хуҗалыгына бара. Ә фермер беренче көнне үк аның документларын тартып ала, үзен хуҗалыкта бикләп асрый, биләмәсеннән чыгармый.

"Документларым булмагач, мин беркая да чыгып китә алмадым. Фермер мине хәтта кыйный, күгәреп беткән азык кына бирә иде", - дип сөйләгән Ерофеев.

Ике дистә ел узгач, бердәнбер көнне ул явыз фермердан качып китә. Бахырны бер яшь гаилә сыендыра, Николайга адвокат яллый, хәтта эш табарга ярдәм итә.

20 ел коллыкта яшәгән ир Польшаны калдырып туган иленә кайтырга җыенмый. "Биредә мин күптән күнектем, телне яхшы беләм", - ди ул. Аның адвокаты исә, Николай Польша гражданы статусын алырга мөмкин, дип исәпли.

Фото: photographers.ua