Янгын электр җиһазларын дөрес кулланмау аркасында чыккан булырга мөмкин.
(Казан, 22 август, «Татар-информ», Полина Шевчук). Татарстанда янгын сүндерүчеләр ут капкан биш катлы йорттан әниләре белән дүрт баланы коткарган. Бу хакта «Татар-информ»га Россия Гадәттән тыш хәлләр министрлыгының Татарстан буенча идарәсенең матбугат хезмәтендә хәбәр иттеләр.
Кичә 4:49 сәгатьтә экстрен хезмәтләр чакыру өчен 112 бердәм номерына Әлмәттә Чернышевский урамындагы йортның беренче катында фатир януын хәбәр итәләр.
Янгын сүндерүчеләр килгәндә йорт янында беркем дә булмый, ә беренче каттагы фатир тәрәзәләреннән төтен чыга. Янгын сүндерүчеләр фатирны тикшерә башлый. Йокы бүлмәсендә хатын-кызны һәм аның 10, 8, 4 һәм ике яшьлек балаларын табалар. Гаиләне урамга алып чыгалар һәм ашыгыч ярдәм табибларына тапшыралар. Балаларны һәм әниләрен хастаханәгә салу таләп ителмәгән.
1,5 квадрат метр мәйданда урын-җир янып беткән. Янгында беркем дә зыян күрмәгән.
Янгын электр җиһазларын дөрес кулланмау аркасында килеп чыккан дип фаразлана.
Нет комментариев