Сыек сабынның катысыннан аермасы нидә?

Казанның косметика кибете консультанты Лилия Гарифуллина әйтүенчә, рекламачылар сүзләрендә, чыннан да, хаклык бар. Уңайлылык һәм гигиена күзлегеннән караганда да, сыек сабын куллануның күпкә җайлы булуы бәхәссез. Кулга тотып сабынлыйсы булмагач, кисәклесендәге кебек, кемнәрдәндер калган бактерия-вируслар ияртү куркынычы юк. Шул ук вакытта күпме сакласаң да, кипми һәм җебеми дә.

Өстенлекләре
Сыек сабыннан файдалану бик  уңайлы һәм экономияле. Дозаторына басуга,  бер тапкыр тиешенчә юыну өчен күпме кирәк, шуның кадәр сабын гына чыга. Үзең белән сәяхәткә алу өчен дә уңайлы: җебеп-агып, киемне пычратудан куркасы юк.

Сыек сабынның кисәклесеннән төп аермасы – составының яхшырак булуында, ди Лилия. Шампунь һәм гельнекенә охшашрак ул. Аңа тән тиресен тәрбияләү өчен эфир майлары һәм башка матдәләр өстәлә.  Кисәкле сабын тән тиресенең саклагыч катламын юып төшереп, тирене киптерсә, сыегы селтенең мондый тәэсиреннән котылуга ярдәм итә.

Составын кара
Сыек сабынны сайлаганда, составына игътибар итәргә кирәк. Фәнни телгә күчсәк, аны җитештерүдә калий тозлары, олеин, аурин кебек май кислоталары, тән тиресен йомшарткыч матдә – сурфактант кулланыла. Шулай ук сыек сабынга глицерин, бактериягә каршы матдәләр өстәлә. Кайвакыт сабын составында натрий тозлары булырга мөмкин. Мондый составлы сабынның сәламәтлек өчен дә, әйләнә-тирә мохит өчен дә зыяны юклыгын белгечләр кат-кат раслап, искәртеп тора.

Шул ук вакытта Лилия Гарифуллина гигиена чарасын тән тиресенең төренә карап сайлап алырга киңәш итә. Нормаль тире өчен глицеринлы, бактерияләргә каршы сабын, коры тире өчен – дымландыргыч, аллергиядән интегүчеләр өчен – гипоаллерген дигәнен сайлагыз, ди ул. Тагын бер мөһим әйбер – pH күрсәткече. ГОСТ буенча, шампуньдә һәм сыек сабында 10,0 саныннан артмаска тиеш. Гипоаллерген яки балалар өчен крем-сабын сайлап алганда бу аеруча мөһим.

Зур савытлысы сыйфатсыз
Сыек сабынны хәзер пластик канистрлар, зур савытлар, герметик пакетларга тутырып саталар. Гадәттә ул арзангарак төшә. Зур савыттагы гигиена чарасы озакка җитә, әлбәттә. Ләкин составы начаррак: чөнки аңа консервантлар, «химия» күбрәк кушыла. Коры, сизгер тән тиресе моны шундук сизеп ала. Иң яхшысы – органик сабын. Үсемлек майларыннан, үлән төнәтмәләре, тән тиресе өчен файдалы витаминнардан тора ул.

Бактерияләр сагында
Коронавирус пандемиясе чорында бактериягә каршы сабыннарны кибет киштәләреннән кырып-себереп алдылар.  Чыннан да, аның составындагы махсус матдәләр бактерия һәм вирусларны юкка чыгара, ди консультант кыз.  Ләкин мондый сабын белән көненә бер тапкыр гына юынырга киңәш ителә. Чөнки составындагы агрессив матдәләре тән тиресен киптерә.

https://vatantat.ru/2022/07/86173/