Аның сүзе бер булыр

Газета чыккач бер танышым: “Әйбәт язгансың, тик андый баш куярга ярамый, депутатлар бар да шундый алар”, – дип шалтыратты. Эх, мин әйтәм, алар бар да шундый булса начар хәлдәге клублар да калмас иде, сайлаган халык күтәреп кенә йөртер иде үзләрен...

Әлеге язманың  менә бу юлларын искә төшерик: “Шушы җирлектән сайланган район Советы депутаты Рафаэль Муллагалиев чыгышы язгы кояш кебек җылытып җибәрде, күңелсез уйларның бер өлешен таратты.

– Монда иске коены күмү турында сүз булды, – диде ул. – Сез ашыкмагыз әле, карыйк без аны башта, яраклы хәлгә китерик. Иске Кишет клубы бик начар хәлдә, дидегез. Район башлыгы белән киңәшим дә, түбәсен алыштырып, нигезен рәтләп, әйбәт хәлгә китерик”.

3 декабрьдә район башлыгы урынбасары Гөлнара Гарипова белән Иске Кишеткә халык белән очрашуга бардык. Безне авыл җирлеге башлыгы Тәбрис Арсланов каршы алды, шатлыгы йөзенә чыккан: “Түбәсе өр-яңа клубның, яңгыр үтә иде бит, китапханә төзекләндерелде, тышкы яктан күп эш башкарылды, Рафаэль Әдһәмовичка зур рәхмәт инде, әле киләсе елга эшләрне дәвам итәрбез”, – ди.

Авыл җирлеге башлыгының башта бигрәк тә китапханәне күрсәтәсе килде. Рафаэль Муллагалиев тә безнең белән.

Китапханә чыннан да бик матурланган уку залында кояш нурлары уйный. Районның иң тәҗрибәле китапханәчесе Гөлфия Габитова эшли биредә. Аның шатлыгы да әйтеп бетергесез. “Дүрт меңнән артык китабыбыз бар”, – ди ул.

Клуб халык белән тулы, диярлек иде. “Мин клубыгыз тулып торса гына эшкә алынам дигән идем, – диде Рафаэль Муллагалиев. – Менә бит клуб тулы, болай булгач, калган эшләрне дә башкарып бетермичә булмый инде. Кишетләр якын миңа, мин монда тумасам да, бераз торган идем (Аның әтисе Әдһәм абый биредә колхоз рәисе булып эшләп, матур эшләр калдырды).

Район башлыгы урынбасары Гөлнара Гарипова илкүләм  проектларны тормышка ашыру буенча башкарылган эшләр турында  сөйләде. “Алдагы көнне Иске Масрада халык белән очраштым,  илкүләм проектлар турында һәрберебез белеп торырга тиеш”, – диде ул.

Соңыннан авыл һәм район мәдәният йорты  хезмәткәрләре матур концерт куйды.

Тәбрис Арслановтан Яңа Кишеттәге кое язмышын да белештем: “Боҗралар төшереп менә дигән итеп эшләп куйдылар коены!” – диде ул.

Районның баш умартачысы Ядкәр Мөхәммәдиев Урта Аты авыл җирлеге башлыгы булып эшләгәндәге бер вакыйга турында сөйләгән иде.

– Безгә Татарстан Республикасы Дәүләт Советы депутаты Ринат Закиров очрашуга килгән иде, – диде ул. – Бар җирне карап чыкты, ошатты. Нәрсә кирәк, дип сорады. Мәктәпкә келәм, китапханәгә бер мең китап бүләк итте. Ул келәмдә әле дә көрәшәләр, китапларны укыйлар – менә дигән истәлек!

Ильяс Фәттахов

Иске Кишет авылы китапханәчесе Гөлфия Габитова китапханәнең яңаруына бик шат