Арча таэквондочысы Россия беренчелегендә Татарстан данын яклады

5-10 июнь көннәрендә Нальчик шәһәрендә 12-14 яшьлек егетләр һәм кызлар арасында таэквон-до буенча Россия беренчелеге үткәрелде. Илкүләм дәрәҗәдәге бәйгедә Россиянең 59 төбәгеннән 767 спортчы көч сынашты. Алар арасында үз төбәкләренең һәм федераль округларның җиңүчеләре бар иде.

Татарстан Республикасы җыелма командасы составында Арча спортчысы Әмир Вәлиев тә катнашты. Ул республика беренчелегендә чемпион исемен яулап, Россия беренчелегенә юллама алган иде.

Нальчиктагы ярышларда Әмир ике очрашу үткәрде. Беренче көрәштә ул Тверь өлкәсеннән килгән көндәшен җиңде. Икенчесендә Мәскәү шәһәренең Олимпия резервы махсуслаштырылган спорт мәктәбе вәкиле белән көч сынашып, аз гына өстенлекне көндәшенә бирде.

Нәтиҗәдә, Арча спортчысы шәхси зачетта 49 катнашучы арасында 17 нче урынны алды. Россия беренчелегендә беренче тапкыр чыгыш ясауга карамастан, ул үзенең әзерлеген һәм техник осталыгын күрсәтә алды.

«Бу ярыш Әмир өчен зур тәҗрибә булды. Ул көчле көндәшләр белән очрашып, үз мөмкинлекләрен күрсәтте», — дип билгелиләр тренерлар.

Узган уку-тренировка елы Арча таэквондочылары өчен уңышлы булды. Спортчылар республика һәм бөтенроссия дәрәҗәсендәге 18 ярышта катнашып, барлыгы 264 медаль яулады. Алар арасында 92 алтын, 91 көмеш һәм 81 бронза бүләк бар.

Арча спорт мәктәбендә таэквон-до белән шөгыльләнүчеләр алдагы сезонда да республика һәм ил күләмендәге бәйгеләрдә катнашырга әзерләнә.