Район мәдәният йортында бәйрәм концерты узды

Бүген, тарихи көн уңаеннан, Арча мәдәният йортында бәйрәм концерты узды. Райондашларыбызны бәйрәм белән Татарстан Республикасы мәдәният министрының беренче урынбасары Юлия Илдар кызы Әдһәмова һәм Арча муниципаль районы башкарма комитеты җитәкчесе Ренат Мансур улы Гатиятов котлады. 

Районыбызның җырга-моңга оста кешеләре бәйрәм сәхнәсен бизәп, тамашачыларга матур концерт бүләк иттеләр. Кечкенә йолдызчык Әминә Йосыпова концертны «Татарстан» җыры белән башлап җибәрде. «Туым жондызы» фольклор коллективы, «Яшь йөрәкләр», «Русская песня» халык вокаль ансамбльләре,  «Шишор» мари халык фольклор коллективы, «Гөлйөзем» вокаль ансамбле татар, рус, мари, керәшен җырларын башкарды. Төрек телендә җырлаучы Элианора Турк, Гультекин Дерин һәм үзбәк җырын башкаручы Тәнзилә Вәлиева әлеге халыкларның милли үзенчәлекләрен җиткерделәр. Биючеләр дә берсеннән-берсе матур биюләр тәкъдим итте: Нурия Әхмәтова башкорт халык биюе, «Сәйлән» бию төркеме испан биюе, «Аллегро» биючеләре рус һәм ирланд халыклары биюләре белән чыгыш ясады. Районыбызның талантлы яшь җырчылары Жасмин Миңнуллина, Аделина Нуретдинова, Рамил Әхмәтҗанов бәйрәм киченә тагын да ямь өстәделәр. Концерт Расих Галимҗанов башкаруындагы «Мин яратам сине, Татарстан» җыры белән тәмамланды.

 Районыбызда узган әлеге бәйрәм концерты илебез халыклары бердәмлегендә зур көч һәм чиксез мөмкинлекләр булуын тагын бер кат ассызыклады.  

ФОТОЛАР АРЧА МӘДӘНИЯТ ЙОРТЫ АРХИВЫННАН