7 сентябрьдә Татарстанда болытлы һава торышы саклана. Көн дәвамында республика районнарында яңгырлар явуы көтелә, ә һава температурасы көндез +21 градуска кадәр күтәреләчәк.
Гидрометеорология үзәге мәгълүматларына караганда, төнлә яңгырлар аерым районнарда гына күзәтелсә, көндез явым-төшемнәрнең күпчелек территорияләрдә булуы фаразлана. Кайбер урыннарда яңгыр көчле булырга мөмкин. Төнлә һәм иртән томан төшү ихтималы бар.
Җил көньяк-көнбатыштан, секундына 5–10 метр тизлектә исәчәк, аерым урыннарда аның тизлеге 14 метрга кадәр җитәргә мөмкин. Төнлә һава температурасы +9...+14 градус тәшкил итсә, көндез +16...+21 градуска кадәр күтәреләчәк.
Казанда да болытлы һава торышы аязынулар белән чиратлашачак. Шәһәрдә вак яңгыр һәм иртән томан көтелә. Көндез башкалада һава +18...+20 градуска кадәр җылыначак.
Белгечләр юлга чыкканда һава шартларын исәпкә алырга, бигрәк тә иртәнге сәгатьләрдә томанлы һәм яңгырлы участокларда сак булырга киңәш итә.
Хәзер Арча һәм Арча районы яңалыкларын безнең Telegram-каналдан да белә аласыз
Нет комментариев