Татарстан белән Әфганстан арасында хезмәттәшлек мөмкинлекләре киңәя: КВЗ һәм КАМАЗ өчен яңа перспективалар ачыла

Россия һәм Әфганстан вәкилләре Халыкара куркынычсызлык форумында хәрби-техник хезмәттәшлек турында килешү имзалады. Әлеге документ Татарстан җитештерүчеләре өчен дә яңа эш юнәлешләре ачарга мөмкин.

Хәзерге вакытта Әфганстан территориясендә Казан вертолет заводында җитештерелгән төрле модификациядәге 100дән артык Ми-17 вертолеты кулланыла. Моннан тыш, илдә 30 меңнән артык КАМАЗ автомобиле һәм аның шассие нигезендә эшләнгән якынча 2 мең махсус техника исәпләнә.

Яңа килешү Татарстан компанияләренә элекке хезмәттәшлек элемтәләрен яңартырга мөмкинлек бирәчәк. Бу, беренче чиратта, кулланылыштагы техниканы ремонтлау һәм хезмәт күрсәтү, запас частьләр, җиһазлар һәм махсус техника белән тәэмин итү өлкәләренә кагыла.

Россиянең Әфганстандагы Эшлекле үзәге җитәкчесе Рөстәм Хәбибуллин сүзләренә караганда, Татарстан предприятиеләре Әфганстанда элек эшләгән сервис һәм гарантия хезмәте станцияләрен яңадан торгызуда катнаша ала.

«Татарстан компанияләре Әфганстан территориясендә Татарстанда җитештерелгән техника өчен сервис үзәкләрен яңадан оештыруда ярдәм күрсәтә ала. Шулай ук афган белгечләрен укыту үзәкләре һәм дилерлык челтәре булдыру мөмкинлеге дә бар», – дип билгеләп үтте ул.

Белгечләр фикеренчә, хезмәттәшлекнең киңәюе Татарстанның машина төзелеше һәм техник хезмәт күрсәтү өлкәләрендә эшләүче компанияләре өчен өстәмә мөмкинлекләр тудырырга мөмкин.

Чыганак:Татар-информ