Татарстанда яшь укытучылар бер тапкыр 90 мең акча алырга мөмкин

Республика Хөкүмәте тарафыннан расланган карар нигезендә, ел саен 35 яшькә кадәрге 100дән артык булмаган педагогка матди ярдәм күрсәтеләчәк. Бер тапкыр бирелә торган түләү күләме 90 мең сум тәшкил итә. Әлеге сумма ике өлешкә бүленеп бирелә: килешү төзелгәннән соң 40 мең сум, ә калган 50 мең сум киләсе елның 31 маена кадәр күчерелә. Бу хакта "Казанские ведомости" хәбәр итә.

Программада катнашу өчен кандидатлар берничә шартка туры килергә тиеш. Алар Россия Федерациясе гражданнары булырга, Татарстан территориясендә даими яшәргә, 35 яшьтән өлкән булмаска һәм педагогик стажы биш елдан артмаска тиеш. Моннан тыш, профильле югары яки урта һөнәри белем булу, шулай ук укытучы вазыйфасында төп эш урынында хезмәт кую мәҗбүри шарт булып тора. Урта һөнәри белем бирү учреждениеләрендә эшләүчеләр өчен — укытучы яки җитештерүгә өйрәтү мастеры вазифасы каралган.

Конкурс сайлап алу тәртибе берничә этапны үз эченә ала. Катнашучылар башта һөнәри белемнәрен тикшерүче тест үтә, аннары психолог белән әңгәмә уза. 

Әлеге ярдәмне алган белгечләр өчен мөһим шартларның берсе — белем бирү оешмасында кимендә бер ел эшләү бурычы. Шулай ук бер педагог мондый ярдәмнән ике тапкырдан артык файдалана алмый.