200 мең сум өчен 90 яшьлек әбине үтергән

Татарстанның Мамадыш районында полицейскийлар 61 яшьлек ир кешене тоткарлый. Аннан 90 яшьлек хезмәт ветеранын үтерүдә шикләнәләр.
Пенсионер ханымның мәетен 28 августта Мамадышның Островский урамындагы  шәхси йортта табып алалар. Тикшерүчләр әйтүенчә, шикләнелүче берникадәр вакыт дәвамында ханымның йорты янында күзәтеп йөргән, ә төн җитүгә, ханымның бүлмәсенә кергән. Хатын-кыз уянып китеп, ярдәм чакырып кычкыра башлый, шунда ир кеше аның башына таш белән сүгып, муенына пычак чәнчи.  Пенсионер ханымның үлгәнен белгәч, җинаятьче йорттан 200 мең сум акча алып кача.
«Үтерү» маддәсе буенча җинаять эше кузгатылган. Тоткарланучының моңа кадәр дә 9 тапкыр хөкем ителүе ачыкланды. Ир кеше гаебен таныган. Җинаять эшен тикшерү дәвам итә.
⠀