Арча педагогика көллияте җитәкчесе Гөлнара Гарипова котлавы:

– Быел Габдулла Тукай исемендәге Арча педагогика көллияте үзенең 90 еллыгын билгеләп үтте. Бай тарихлы уку йортыбызны тәмамлаган меңләгән егет һәм кыз бүгенге көндә мәктәпләрдә балаларга педагогик белем бирә. Араларында озак еллар педагогика өлкәсендә эшләп, дан-шөһрәт казанган укытучылар да бар. Алар бүген дә Арча педагогика көллиятендә белем алулары белән горурлануын белдерә.

Бу ел вакыйгасын зурлап үткәрүне планлаштырган идек. Тик пандемия нәтиҗәсендә ул планыбыз тормышка ашмады. Шулай да юбилеебызны онлайн-концерт белән билгеләп үттек. Анда студентларыбыз белән бергә бездә укып белем алган, хәзер эстрада йолдызларына әверелгән укучыларыбыз да чыгыш ясады. Бу чара хезмәт ветераннарыбызга, укытучыларыбызга, бездә укып чыгып, хәзерге вакытта дөньяның төрле почмакларында эшләүче укытучыларга, студентларга юбилей сәламе булып барып ирешсен.

Аларның барысын да, шулай ук райондашларыбызны Яңа ел белән тәбрик итәм. Нык сәламәтлек, бәхетле матур тормыш телим. Исән-имин булыйк.