Татарстан Республикасы буенча Социаль фонд бүлеге хәбәр иткәнчә, яңа ярдәм чарасы 2026 ел өчен гаилә кеременә карап бирелә. Гаризаларны 1 октябрьгә кадәр тапшырырга мөмкин.

Кемнәр еллык гаилә түләвенә хокуклы?

Түләү ике һәм аннан күбрәк баласы булган эшләүче ата-аналарга каралган. Балаларның яше 18 яшькә кадәр булырга тиеш. Көндезге бүлектә белем алучы балалар өчен түләү 23 яшькә кадәр бирелә.Гаиләнең җан башына уртача кереме 22 609,5 сумнан артмаска тиеш.Татарстан Республикасы буенча Социаль фонд бүлеге мәгълүматларына караганда, 1 июньнән 25 меңнән артык еллык гаилә түләве билгеләнгән.

Түләү күләме ничек исәпләнә?

Еллык гаилә түләве ата-ананың бер ел эчендә түләгән физик затлар кеременә салымын (НДФЛ) исәпкә алып билгеләнә.Түләү күләме — түләнгән НДФЛ белән 6 процентлы ставка буенча исәпләнгән салым суммасы арасындагы аерма. Шуңа күрә һәр гаилә өчен ярдәм күләме аерым була.Социаль фондның Татарстандагы бүлеге хәбәр иткәнчә, түләүне рәсмиләштерү өчен гаиләнең керемнәре һәм балалар турында мәгълүматлар тикшерелә.

Гаризаны кайда бирергә?

Еллык гаилә түләвенә гаризаны 2026 елның 1 октябренә кадәр тапшырырга кирәк. Моның өчен берничә мөмкинлек бар:

• «Дәүләт хезмәтләре» порталы аша;

• күпфункцияле үзәкләрдә (МФЦ);

• Социаль фондның клиент хезмәтләрендә.

• Татарстанда балалы гаиләләргә еллык түләү буенча рәсмиләштерү мөмкинлеге 2026 ел дәвамында саклана. Гариза бирергә теләүчеләргә билгеләнгән вакытны истә тотарга кирәк.

Хәзер Арча һәм Арча районы яңалыкларын безнең Telegram-каналдан да белә аласыз