Чәч коелмасын өчен ни эшләргә?

Югары категорияле табиб-трихолог, Халыкара трихологлар ассоциациясе әгъзасы Мария Богданова борчыган сорауларыбызга ачыклык кертте.

– Чәч коелганга борчылырга кирәкме?

– Көненә 100–150 чәч бөртеге төшү норма санала. Чәч аннан да күбрәк коела икән, сәбәпләрен ачыкларга кирәк. Гадәттә андый хәл сәламәтлек ягыннан үзгәрешләр булганда (калкансыман биз эшчәнлеге бозылу, гипофиз, кызылча авырулары, гемоглобин түбән булу, химия терапиясе алу, йөклелек) күзәтелә. Чәч коелуга физиологик сәбәпләр дә (стресс, курку хисен җиңә алмау, дөрес тукланмау) этәргеч була ала. Яшәү рәвешенең дә йогынтысы зур, әйтик, организмда А витаминының чамадан тыш күп булуы, Д витамины, аксым җитмәү, аз хәрәкәтләнү, чәчләрне даими рәвештә бөдрәләтү, турайту. Чәчләрнең чамадан тыш коеламы-юкмы икәнен төгәл ачыклау өчен, кичекмәстән табибка барырга кирәк.

– Башны еш юу зыянлы, диләр. Бу чынлап та шулаймы?

– Чәчне атнага фәлән тапкыр гына юарга ярый дигән чикләү юк. Аны күпме кирәк, шулкадәр юарга мөмкин. Көн саен юынып торабыз бит. Шуның кебек, әгәр баш тирегез даими рәвештә чистартып торуны таләп итсә, көн саен чәч юуның да зыяны юк.

– Кавыклану чәч коелуга китерә аламы?

– Юк, бу – уйдырма гына. Әмма шунысын да истә тотарга кирәк: чәч, баш тиресе һәрчак чиста булырга тиеш. Бүген халык арасында аеруча популяр булган каты, коры, парабенсыз, сульфатсыз шампуньнар аларны чистартып бетермәскә дә мөмкин. Нәтиҗәдә баш тиресенең чистарып бетмәгән урыннары, бозылып, кавыклый башлый. Ахыр чиктә чәч тә коела. Болар бар да «себорейный дерматит» дигән диагноз куелуга сәбәп була.

– Чәч ныклыгын нәрсә боза?

– Чәчне дөрес итеп тәрбияләргә кирәк. Үзеңә туры килмәгән шампунь, кондиционер куллану бик зыянлы. Чәчләрне даими рәвештә турайтып, бөдрәләтеп «яндыру» да зыян китерә. Салкында яки җәйге челләдә кояш астында башка кимичә йөрү, чәчне буяу, химик ысул белән бөдрәләтү, ламинирование, кератин ясау да файдага түгел.

– Бу күренеш нәселдән килә аламы?

– Әйткәнемчә, көн саен азмы-күпме чәч коелу – гадәти хәл. Бу очракта аны нәселдәнлек белән бәйләп булмый. Әгәр чәч ниндидер җитди чир аркасында коела икән, ул очракта инде ул нәселдән дә күчкән булырга мөмкин.

Дәвамы: https://vatantat.ru/2024/11/156363/
© Ватаным Татарстан