Коммуналь хезмәтләргә бәяләр арта: кемнәргә күбрәк түләргә туры киләчәк?

Рәхәт тормыш өчен тагын да күбрәк түләргә туры киләчәк: 2025 елның 1 июленнән республикада коммуналь хезмәтләргә тарифлар уртача 17,5 процентка артачак. Ут, суга бәяләр гадәттә елга бер тапкыр җәй көне ил күләмендә кыйммәтләнә. Искәрмәләр дә бар. Хәтерләсәгез, 2022 елда тарифларны елга ике тапкыр – июль һәм декабрь айларында арттырдылар. Аның каравы 2023 елда кагылмадылар. 2024 елның 1 июленнән Татарстанда коммуналь хезмәтләргә тарифлар уртача 10,8 процентка кыйммәтләнде.

2025 ел бәяләренә әйләнеп кайтыйк. Билгеле булганча, уртача тариф аерым муниципаль берәмлекләр буенча аерыла ала. Моның өчен рәсми рәвештә расланган «мөмкин булган максималь тайпылыш» күрсәткече гамәлдә. Ул 4,8 процентны тәшкил итә. Шул рәвешле, 1 июльдән республикада яшәүче 1,6 миллион чамасы кеше өчен коммуналь хезмәтләргә тарифлар барыннан да күбрәк – 22,3 процентка кадәр артачак. Исемлеккә республиканың 21 шәһәре, шәһәр тибындагы 15 бистә һәм 7 авыл эләккән. Шул исәптән, Казан, Чаллы кебек зур шәһәрләрдә яшәүчеләргә кыйммәтрәк түләргә туры киләчәк.

Ничек азрак түләргә?

– Кирәк булмаган электр җиһазларын уттан алыгыз. Алар сүнгән булса да, электр энергиясе сарыф итә. Мәсәлән, телевизор шул рәвешле елына – 250, кесә телефоны чыбыгы 150 сум акча «ашый».

– Теш чистарткан арада кранны ябыгыз. 2 минутта 19 литр су ага.

– Савыт-саба юу машинасы елына 15 мең литр суны янга калдыра.

– Гадәттә торбалар тәрәзә астыннан уза. Челтәрләр исә җылылыкның 20 процентын үткәрми.

– Чәйнеккә суны гадәт буенча «бугаз»ыннан тутырып түгел, ә үзегезгә кирәк кадәр генә салып кайнатыгыз.

Чыганак (тулы язма): https://vatantat.ru/2025/05/171114/
© Ватаным Татарстан