2023 елның декларация кампаниясе башланды

Әңгәмәдәш – Казандагы 5нче районара салым инспекциясенең физик затлар белән эшләүче бүлек җитәкчесе Мөнир Шәйдуллин.

- Мөнир Әмирович, 2023 елның 1 гыйнварыннан ел саен була торган декларация кампаниясе башланды. Шул турыда җентекләбрәк сөйләсәгез иде.

- 2023 елның 1 гыйнварыннан башланган декларация ул - 2022 елда алынган керемнәр турында хисап тоту документы. Бу ел саен салым инспексияценә тапшырыла торган документ.

- Бу кемнәргә кагыла?

- Милеген, кыйммәтле кәгазъләрен саткан, милеген арендага биргән, якын туганы булмаган физик затлардан күчемсез милекне, транспорт чараларын, акция,  пайларны бүләккә алган, откан, Россия Федерациясеннән читтән  керемнәр алган кешеләргә кагыла бу. Алар 3 – НДФЛ формасында салым органына керем турында декларация тапшырырга тиешләр.

-Физик затлардан тыш тагын кемнәр декларация тапшырырга тиешләр?

- Керемнәре турындагы декларацияне тагын шәхси эш белән шөгыльләнүче эшмәкәрләр, нотариуслар, адвокат кабинетлары булган адвокатлар тапшырырга бурычлылар.

-Ә декларацияне нинди юл белән тапшыру уңайрак?

- 3-НДФЛ формасындагы декларацияне салым органына үзеңә уңайлы юл белән тапшырып була. Декларацияне Россиянең Федераль салым хезмәте сайтындагы “Физик затлар өчен шәхси кабинет” сервисы аша тапшыру уңайрак. Анда күп мәгълуматлар инде тутырылган. Шәхси кабинет аша эш йөртү милек яки социаль салым чигерүләрен алу максатыннан салым декларацияләрен тапшыру өчен дә җайлы.

- Декларацияне кайчанга кадәр тапшырып була?

- 2023 елның 2 маеннан да соңга калмыйча декларацияне тапшырырга кирәк. Физик затларга керемгә салым түләү вакыты – 2023 елның 17 июленә кадәр. Декларация формасы рәсми Боерык (29.09.2022, №ЕД-7-11/880@) белән расланган.

- Салым чигерүләре акчасын алу максатыннан тапшырылган декларацияне дә 2023 елның 2 маеннан да соңга калмыйча тапшырырга кирәкме?

- Юк. Салым чигерүләре акчасын алу өчен тутырылган декларацияне елның теләсә кайсы вакытында салым органына тапшырырга була. Монда чик юк.

- Аңлатуыгыз өчен рәхмәт