Арчада район башлыгы призына көрәш ярышы бара

Ярышны ачу тантанасында Арча районы башлыгы Илшат Нуриев, ТРның көрәш федерациясе башкарма директоры Марсель Таһиров, «Татарстан яшьләре» газетасының баш мөхәррире, көрәш буенча югары категорияле судья Атлас Гафиятов, көрәш буенча югары категорияле судья Рифкать Җәләев, күп еллар район көрәш федерациясен җитәкләгән Ренат Алиев һәм «Арча» спорт мәктәбе директоры Фәнил Һидиятуллин катнашты.  

«Районыбызның көрәшче егетләре елдан-ел зур уңышларга ирешә. Без сезнең белән горурланабыз. Зур рәхмәт сезгә», – диде район башлыгы.

 Марсель Таһиров көрәш спорт төренең  республикада торышы белән таныштырып үтте. «Катлаулы еллар булуга карамастан, көрәш үзенең принципларыннан китмәде. Ел дәвамын календарь буенче сигез, аннан тыш районарда төрле дәрәҗәдәге 276 көрәш ярышлары үтте. Быел да алар дәвам итә. Күптән түгел генә Татарстан беренчелеге үтте. Иң дәрәҗәле, елга нәтиҗә ясый торган көрәшебез, 3-15 февральдә Муса Җәлил турниры узачак. Аның географиясе киңәйтелде. Анда сезне дә көтеп калабыз», – диде ул. Арчаның көчле районнар исемлегендә булуын әйтеп, район җитәкчелегенә, тренерларга рәхмәт сүзләрен җиткерде. 

Көрәш ярышларында иганәче булучы «Игенче», «Курса МТСы» хуҗалыклары, «Айракс» сәүдә үзәге җитәкчеләренә рәхмәт хатлары тапшырылды. Ярышларда аеруча актив булып, ярдәм итеп торучы көрәшчеләрнең әти-әниләре Рания һәм Алмаз Искәндаровлар, Гүзәл һәм Дамир Әгълиуллиннар, Рәмзия һәм Зөлфәт Ахуновларга да мактау сүзләре җиткерелде, рәхмәт хатлары бирелде.

Берничә үлчәү авырлыгында  ике келәмдә көрәш башланып китте. Нәтиҗәләре белән соңрак таныштырырбыз