Мәскәүдән Рәхмәт хаты килде

“Халык фронты командасы сезгә уртак эшкә керткән өлешегез һәм нәтиҗәле хезмәтегез өчен рәхмәт белдерә. Сезнең тырышлыгыгыз безгә җәмгыятебезгә хезмәт итүдә зур уңышларга ирешергә мөмкинлек бирде”.

Әнә шундый сүзләр язылган иде анда. Тулырак мәгълүматны безгә Бөтенроссия “Халык фронты” хәрәкәте әгъзасы, Арча егете Руслан Әһлиев бирде.

– Арча станциясендә элеккеге “Чингисхан” кибете, ягъни, аңлаешлырак булсын өчен әйтеп китәм, элеккеге милли аяк киемнәре фабрикасы янында хәрәкәт көчле булу сәбәпле, җәяүлеләр аны аркылып чыга алмый тилмерә иде. Халык бу урында җәяүлеләргә юл аркылып чыгу өчен уңайлык тудыруда ярдәм итүне сорап миңа мөрәҗәгать итте. Кешеләрнең йөгереп чыкканын үзем дә күреп йөри идем инде, әмма машинадагы кеше җәяүленең хәлен аңлап бетерми бит, – диде Руслан Әһлиев. – Халыкның гозерен искә алып, мин Арча эчке эшләр бүлегенең ЮХИДИ бүлекчәсе җитәкчесе Рөстәм Хәкимовка мөрәҗәгать иттем. Бөтенроссия “Халык фронты” хәрәкәте аркылы сорыйсы идем дә, ЮХИДИ бүлекчәсе җитәкчесе үзе хәл итәргә тырышачагы турында әйтте. Һәм сүзендә торды да.

  Бу урынга махсус җәяүлеләр аркылып чыгу урыны (“зебра”) эшләнгән, шуны күрсәтүче юл билгесе куелган, ясалма күтәртмәлек тә ясалган.

Руслан Әһлиев Рөстәм Хәкимовка рәхмәт белдереп, Бөтенроссия “Халык фронты” хәрәкәтенә хәбәр җибәргән. Җавабы озак көттермәгән, “Халык фронты” командасы исеменнән ЮХИДИ бүлекчәсе җитәкчесенә Мәскәүдән  Рәхмәт хаты килгән.

– Мин аны Рөстәм Хәкимовка  үзем тапшырдым. Бөтен халык, шәхсән үз исемемнән рәхмәт белдердем, – диде Руслан Әһлиев. – Ул бер гозерне дә кире какмый, халык соравын канәгатьләндерергә тырыша. Коммуна урамына да, Арча станциясеннән стадионга бара торган юл ул, кешеләргә уңай булсын, дип юлга ясалма күтәртмәлек куйдырды. Бер әйтү җитте, шунда ук эшләде дә. Аңа киләчәктә дә халык фикерен исәпкә алып  уңышлы эшләвен  телибез.