ДРКБ кардиохирурглары сабыйның үз тукымаларын кулланып йөрәккә уңышлы операция ясады

Татарстанның Балалар республика клиник хастаханәсендә (ДРКБ) кардиохирурглар тумыштан килгән аорта клапаны җитешсезлеген дәвалауда заманча алым кулланды. Яңа технология беренче тапкыр бер яшьлек балага уңышлы кулланылган.

Татарстан Республикасы сәламәтлек саклау министры Әлмир Абашев хәбәр иткәнчә, операция вакытында ясалма материаллар урынына пациентның үз аорта дивары тукымасы файдаланылган. Бу ысул йөрәк клапанын торгызганда организм тарафыннан яхшы кабул ителә.

Балага беренче операция ул бер айлык чакта ук ясалган булган. Ул вакытта аңа тумыштан килгән аорта стенозы диагнозы буенча ярдәм күрсәтелгән. Әмма вакыт узгач, аорта кабат тарайган, шуңа күрә кабат хирургик дәвалау кирәк булган.

Табиблар аңлатуынча, әлеге патология вакытында аорта киңәя. Бу үзгәреш операция барышында кан тамырының бер өлешен имин рәвештә алып, аны клапанны яңадан торгызу өчен кулланырга мөмкинлек бирә.

«Пациентның үз тукымаларын куллану операция нәтиҗәләрен яхшыртырга ярдәм итә», – дип хәбәр итте Татарстан сәламәтлек саклау министры Әлмир Абашев.

Белгечләр фикеренчә, мондый алым тумыштан килгән йөрәк авырулары булган балаларга күрсәтелә торган югары технологияле медицина ярдәмен тагын да нәтиҗәлерәк итәргә мөмкин.

Чыганак: Татар-информ