Казанда «Онкологика» хәйрия фондының ярдәм үзәге ачылды. Үзәк онкология белән авыручыларга һәм аларның гаилә әгъзаларына психологик һәм юридик ярдәм күрсәтә.

Мондый үзәкләр Екатеринбург, Краснодар, Түбән Новгород, Самара һәм Санкт-Петербург шәһәрләрендә дә эшли.

Казан үзәгендә нинди ярдәм күрсәтелә?

Яңа үзәктә онкология диагнозы куелган кешеләр психолог һәм юрист белән бушлай киңәшә ала. Белгечләр авыру вакытында килеп туган эмоциональ һәм көнкүреш мәсьәләләрен хәл итүдә ярдәм итә.

Моннан тыш, үзәктә «онкомейтлар» белән очрашулар үткәрелә. Алар — онкологик авыруны үзләре кичергән һәм бу тәҗрибә аша узган кешеләр. Алар белән аралашу пациентларга һәм аларның якыннарына үзләрен борчыган сорауларга җавап табарга мөмкинлек бирә.

Казандагы «Онкологика» ярдәм үзәге координаторы Ләйлә Димөхәммәтова сүзләренчә, яңа мәйданчык кешеләргә авыру белән ялгыз калмаска ярдәм итәчәк.

«Онкологик авыру белән очрашканда, диагноз белән бергә күп кенә сораулар, борчылулар һәм билгесезлек барлыкка килә. Татарстанда яшәүчеләр хәзер Казанда ярдәм алырга мөмкин булган урын барлыгын белсен иде. Монда ярдәм итәчәкләр, терәк булачаклар һәм кирәк булганча янәшәдә калачаклар», — диде Ләйлә Димөхәммәтова.

Үзәк кайда урнашкан?

«Онкологика» фондының Казандагы ярдәм үзәге Абсалямов урамы, 13нче йортта, беренче катта урнашкан. Керү Ozon ягыннан.

Үзәк дүшәмбедән җомгага кадәр 11:00дән 19:00гә кадәр, төшке ялсыз эшли.

Проект Россия Президенты гранты кысаларында, Президент грантлары фонды ярдәме белән тормышка ашырыла.

«Онкологика» хәйрия фонды — онкологик авырулары булган өлкәннәргә һәм аларның якыннарына Россиянең төрле төбәкләрендә системалы ярдәм күрсәтүче коммерцияле булмаган оешма.

Чыганак: Татар-информ